(NLTimes)—Pronto Georgia lo ta e prome estado na Merca pa ofrece productonan di marihuana medico na boticanan independiente, segun oficialnan di estado a anuncia.
Georgia Board of Pharmacy a cuminsa acepta aplicacion e siman aki, y caso 120 botica a dicidi pa provee medicamento di Botanical Sciences, un di e dos compania di produccion den e estado, segun The Atlanta Journal-Constitution a reporta. Lo dura probablemente algun siman prome cu marihuana medico ta disponibel den boticanan. Despues cu nan a entrega aplicacion, lo tin mester di conduci inspeccion prome cu e directiva duna aprobacion.
Marihuana medico ta solamente disponibel pa residentenan di Georgia cu aprobacion di un dokter pa trata malesanan severo manera convulsion, cancer terminal, malesa di Parkinson’s y PTSD. Azeta di THC por contene no mas di 5% di THC, cual ta e componente cu ta duna usuarionan un sensacion di euforia.
E expansion di bentanan di cannabis medico den tiendanan di medicamento lo pone azeta di THC den alcance di hopi mas pashent, agregando na e shete deposito di e estado cu a habri desde april.
E Georgia General Assembly a aproba e distribucion di azeta di THC como parti di un ley di estado implementa na 2019, pero a tuma varios aña pa crea regulacionnan pa seguridad, inspeccion, permiso y distribucion. Gobernador Brian Kemp a aproba reglanan luna pasa cu a ser implementa pa e Georgia Board of Pharmacy, trahando caminda pa e benta na boticanan.
Georgia Department of Public Health a revela recientemente cu el a haci un eror cu e conteo di pashent cu ta registra pa uza marihuana medico. Solamente 14.000 pashentnan y proveedor di cuido activo ta registra, hopi menos cu e 50.000 cu a ser reporta den pasado.
“Nos ta bay tin pashent cu mester di e sorto di cuido aki den algun parti isola di Georgia cu probablemente nunca lo no por yega na dje,” segun Jonathan Marquess, vice-presidente di Georgia Pharmacy Association y e doño di varios botica den e area di Atlanta. “Pero nan tin un profesional di cuido si cu ken nan por papia.”
Tin mas cu 400 botica independiente na Gergia, y Marquess a bisa cu e ta espera cu mayoria di nan lo ta interesa den e bendemento di azeta di THC. E producto aki no ta ser bendi den boticanan nacional manera CVS y Walgreens.
