Estadonan Uni a emiti diahuebs ultimo un excepcion riba e sancionnan contra e bononan Venezolano, pa permiti cu e tenedornan di e bono Pdvsa 2020 por reclama e cobransa di nan garantia (mas cu mita di e accionnan di Citgo) den caso cu gobierno di Nicolas Maduro no por cumpli cu e pagonan, segun e medio BancayNegocios.com.
E Oficina di Control di Activo Stranhero (Office for Foreign Assets Control; OFAC) a publica e “licencia number 5” cu ta autorisa e ciudadano o empresanan Mericano cu tin den nan poder e bono Pdvsa 2020, exigi e colateral di e instrumento (50,1% di e accionnan di Citgo) den caso cu no ta cumpli cu e pago, accion cu tabata prohibi di acuerdo cu e terminonan di un orden ehecutivo di presidente Donald Trump, firma na mei pasa.
“Ta autorisa e tenedornan di bono pa por eherce e derechonan relaciona cu e bono Pdvsa 2020, pa impedi cu e regimen di (Nicolas) Maduro ta usa e orden ehecutivo pa keda sin cumpli cu su obligacionnan di bono, sin consecuencia. Cu e meta di proporciona e autorisacion ey, OFAC ta emitiendo e licencia general 5, cu ta elimina e orden ehecutivo 13.835 como un obstaculo pa e titularnan di bono Pdvsa 2020 por accede na nan garantia, y asina mantene e presion di e sancionnan unda nan mester ta: riba e regimen di Maduro,” Ofac ta señala riba su website.
Nota di redaccion: E garantia di 50,1% di e accionnan di Citgo a ser otorga na tenedornan di un prestamo grandi di US$2,8 biyon cu Citgo Petroleum y Citgo Holding a tuma na 2015, pa pasa pa Pdvsa como dividendo, cu ta propietario 100% di Citgo. Despues a compromete e restante 49,9% di e accionnan como garantia di cumplimento cu e empresa petrolero Ruso Rosneft, pa prestamo di e empresa ey duna na Pdvsa.
Den e caso cu e tenedornan di bono logra via corte tuma control di 50,1% di e accionnan, practicamente e control di Pdvsa y gobierno Venezolano riba Citgo Petroleum lo yega na un fin. E companianan funda na Aruba cu ta carga nomber Citgo no tin relacion huridico cu Citgo Petroleum Corporation, pero ta subsidiario di PDV Holding na Merca, cu na su turno ta subsidiario 100% di Pdvsa.
(fuente: Lapatilla/BancayNegocios.com)
