(AP)—Al menos un clinica na Alabama a resumi den tratamentonan di in vitro fertilisacion (IVF) despues cu e gobernador a firma un legislacion den ley protehando proveedornan di posibel riesgo legal. Esaki a ser dicidi pa un corte cu a egualisa embryonan gevriesd cu muchanan.
Alabama Fertility Specialists a conduci varios transferencia di embryo diahuebs, segun media a reporta. Video for di CBS News a mustra empleadonan celebrando cu un brindis, y Dr. Mamie McLean a bisa cu pa mira pashentnan atrobe tabata “increiblemente emocionante.”
Alabama Fertility tabata entre tres clinica cu a pausa e proceduranan despues cu e Corte Supremo di Alabama a dicidi luna pasa cu tres pareha, di ken nan embryo a ser destrui den un accident na e facilidad, por persigui un caso di morto inhusto pa nan “muchanan extrauterino.” E huicio, tratando un embryo mescos cu un mucha of fetus gestando bao e statuut di morto inhusto, a causa preocupacionnan tocante riesgonan pa clinicanan.
E ley nobo, cual a tuma efecto inmediatamente ora e firm’e diaranson anochi, ta proteha proveedornan for di persecucion y casonan civil “pa e daño na of morto di un embryo” durante servicionan di IVF.
University of Alabama na Birmingham a bisa den un declaracion diamars cu e tabata “trahando pa schedule pashent of reschedule pa tratamentonan lo mas pronto posibel,” pero no a bisa exactamente ki ora esey lo ta. Un vocero no a responde inmediatamente na un e-mail diabierna.
“Pashentnan di ken nan circunstancianan di salud of fase di tratamento ta rekeri urgencia lo ser poni riba schedule prome,” e declaracion a bisa. E Center for Reproductive Medicine na Mobile a bisa den un declaracion cu e lo no re-habri te ora cu e tin claridad legal “riba e extento di inmunidad” cu e ley estatal ta provee.
“Na momento aki, nos ta kere cu e ley ta falta adresa e webonan fertilisa actualmente warda den henter e estado y ta laga retonan pa dokternan y clinicanan di fertilisacion purbando di yuda famianan merecido haya yiu di nan mes,” e declaracion a bisa.
E centro tabata un acusado den e casonan di morto inhusto cu e Corte Supremo di Alabama a considera den su huicio di IVF luna pasa.
