(TheWashingtonPost)—Data nobo ta mustra cu hopi mucha chikito no ta comiendo fruta y berdura tur dia, pero si ta consumi bebidanan di sucu mas regularmente.
Na 2021, un tercer di muchanan di 1 pa 5 aña no ta come fruta tur dia, y casi mita no ta come berdura tur dia, segun un rapport nobo di e Centronan di Control di Malesa y Prevencion. Na mesun momento, 57% di mucha den 40 estado, incluyendo e Districto di Colombia, ta bebe bebida di sucu al menos un biaha pa siman, e rapport ta bisa.
Na Oklahoma, Tennesse, Louisiana y Mississippi, mas cu 70% di muchanan no ta come fruta ni berdura tur dia. E porcentahe mas halto a wordo descubri entre muchanan color scur y esun mas abou entre muchanan blanco no Latino.
CDC a lansa un encuesta unda nan a puntra mayornan con hopi nan yiu a come 3 tipo di cuminda den e siman cu a pasa. Pa locual ta berdura, a specifica cu batata hasa y chips di batata no ta conta. Pa locual ta fruta, juice no ta conta. Esaki e cientifico di salud na CDC y autor di e rapport, Heath Hamner, a declara. E agencia a specifica cu fruta y berdura fresco, ‘frozen’ of den canica si ta conta.
Segun Hamner, babynan di 1 aña ta come bastante fruta y berdura, pero ora cu nan yega edad di kleuterschool, e custumbernan ta cambia: “Nan ta cuminsa bon y mester sigui asina. Muchanan ta wordo introduci na cumindanan duro cu 6 luna, y nan mester cambia pa e dieet di e famia pa ora nan yega 1 aña di edad,” Hamner a bisa.
E data cu el a colecta ta subraya e necesidad pa politica mas streng y cambio den sistemanan pa por haci cu muchanan ta cumpli cu nan rekisito di nutricion pa tur dia, segun Megan Lott, ken ta sub-directora di investigacion di cuminda saludabel na Duke Global Health Institute.
E Departamento di Agricultura na Merca a anuncia recien cu nan lo implementa nutricion mas streng pa scol, limitando pa prome biaha e cantidad di sucu; reduciendo e cantidad di sodium y subrayando cereal integral. Pa prome biaha tambe, e guia pa productonan di lechi ta inclui un guia pa babynan recien naci y muchanan chikito, sugeriendo pa no duna sucu na mucha bou di 2 aña.
E Academy of Nutrition and Dietetics, American Academy of Pediatrics, American Academy of Pediatric Dentistry y e American Heart Association a bay un stap mas leu, publicando un declaracion sugeriendo cu muchanan bou di 5 aña no mag di consumi bebidanan di sucu mes. Segun nan, “dimas consumo di bebidanan cu no ta saludabel den infancia por contribui na un riesgo pa malesanan relata na dieet, manera obesidad, diabetes tipo 2 of problema cu djente.”
Programanan di nutricion federal y politicanan di estado por aumento acceso na fruta, berdura y bebidanan saludabel, pero ta dificil pa influencia e custumber di come di muchanan prome cu nan drenta scol, y inflacion riba cuminda a causa cu prijs di fruta y berdura ta dificil pa cumpra pa famianan pober. Jamie Bussel, ken a studia obesidad den mucha pa e Robert Wood Johnson Foundation, a bisa cu 25 miyon famia Mericano a reporta cu nan ta experienciando insiguridad di cuminda.
E reto por ta mas grandi di cual CDC a reporta. Mayornan tin incentiva fuerte pa racionalisa cu loke nan ta duna nan muchanan ta bon, hasta si esaki no ta corecto. Esaki ta specialmente visibel pa muchanan cu ta fastioso cu cuminda y ta prefera di no come cu come algo cu nan no gusta. Y manera tur mayor sa, bo por guia bo yiunan na cumindanan saludabel, pero no tur ora bo por forsa nan pa come saludabel.
