(EFE) – Presidente di Merca, Joe Biden, a manda un carta na senadornan y legisladonan democrata di Congreso den cual a insisti cu lo sigui den e carera presidencial contra Donald Trump aunke, tin basta critica den su contra.

“Mi kier pa boso sa cu a pesar di tur speculacion den prensa y na otro espacionan, mi ta firmemente comprometi pa permanece como candidato presidencial, pa yega te final y vence Donald Trump,” el a afirma.

E democrata a afirma cu no lo a bira candidato pa presidencia mas “si mi no tabata kere absolutamente” cu “mi ta e miho persona pa vence Donald Trump,” ex-presidente republicano (2017-2021).

Biden a conta cu, despues di e criticanan causa pa su mal actuacion den debate presidencial di 27 di juni ultimo, a tene “combersacionnan extenso cu lidernan di partidonan, funcionarionan, miembronan di base y votadonan.”

“Mi a scucha e preocupacionnan di e hende y di e miembronan cu ta expresa di bon fe, riba loke ta den wega den eleccion aki. Mi sa esey,” e presidente di 81 aña ken ta aspira e reeleccion e proximo 5 di november a afirma.

Segun el a relata, den dianan aki tambe a ricibi varios “expresion di afecto.” “Mi ta gradici pa e apoyo solido y firme tanto di democrata eligi na Congreso y na tur e pais,” el a afirma.

Biden a destaca e importancia di eleccion primario cu a celebra na varios estado den cual, ni un otro candidato potente a resulta ganador. Den procesonan aki, segun el a afirma, a ricibi mas di 14 miyon voto, 87% di e voto emiti.

“Mi tin mas di 3,900 delegado, loke ta nifica cu mi ta e candidato di nos partido cu un margen amplio,” el a destaca.

E presidente actual a bisa cu e ta nenga di bisa cu e proceso aki no ta importa. “E votadonan di e Partido Democrata a vota. Nan a eligi mi pa mi ta e candidato di e partido,” el a afirma.

Despues di su rol hopi cuestiona den e debate y criticanan constante pa su edad, Biden ta enfrentando bosnan den e fraccion democrata cu ta pidiele pa e retira.

Diadomingo ultimo, por ehemplo, e corant New York Times a publica cu por lo menos dies congresista democrata a haci un peticion pa Biden bandona su candidatura presidencial.

Congreso ta bay back na Washington awe pa prome biaha despues di e debate di 27 di juni, loke a provoca un preocupacion general riba e capacidad di Biden pa sigura e victoria di democratanan na november y permanece cuatro aña mas den poder.