(AP)—Presidente Mericano Joe Biden a firma un orden ehecutivo dialuna diseña pa avansa e estudio di salud di hende muhe por medio di fortalece coleccion di data y provee miho oportunidad financiero pa investigacion biomedical.
Pa hopi tempo caba, salud di hende muhe no ta haya suficiente atencion y fondo. Tabata te añanan 1990 cu e gobierno federal a ordena pa hende muhe ser inclui den investigacion medico funda pa e gobierno federal; pa mayoria di historia medico, estudio cientifico tabata basa casi completamente riba hende homber.
“Ainda nos sa tiki tocante con pa preveni, diagnostica y trata un variedad di condicion di salud den hende muhe,” segun Dr. Carolyn Mazure, hefe di e iniciativa di e Cas Blanco riba salud di hende muhe.
Awendia, investigacion frecuentemente ta fracasa di registra diferencianan entre hende muhe y hende homber, y no ta representa hende muhe igualmente pa particularmente malesanan mas comun na nan—di cual Biden a sugeri su orden lo yuda cambia.
Biden a bisa cu pa hopi tempo e ta kere den e “poder di investigacion” pa yuda salba bisa y tin cuido medico di calidad halto pa hende cu mester. Pero e orden ehecutivo tambe ta cumpli cu un otro meta politico durante un aña di eleccion unda hende muhe lo ta crucial pa su esfuersonan di re-eleccion. Prome Dama Jill Biden ta liderando ambos e esfuerso pa organisa y mobilisa votadonan femenino y e Iniciativa di Cas Blanco riba Investigacion di Salud di Hende Muhe.
E anuncio ta bin como cu e efectonan ta plama pa via di e decision di e Corte Supremo pa anula derechonan federal di abortus, adresando problemanan medico pa hende muhe cu nunca tabatin e intencion pa termina nan embaraso. Na Alabama, por ehempel, e futuro di IVF ta den cuestionamento despues di un huicio estatal.
Den su comentario, Biden no a menciona ex-presidente Donald Trump pa nomber, ken awo ta purba di tuma e Cas Blanco back. Biden a referi na “mi predecesornan” ken tabata “gaba pa anula” e decision di Roe v. Wade cu a garantisa derecho constitucional na abortus.
E presidente a sugeri cu esey lo daña Trump su campaña electoral, bisando cu “bo no por lidera Merca cu ideanan antiguo cu ta hiba nos atras.”
Vice presidente Kamala Harris, abogado di salud di hende muhe Maria Shiver y e prome dama tambe a adresa e asunto. “Porfin hende muhe lo haya e cuido medico cu nos merece,” Jill Biden a bisa, bisando cu e orden firma dialuna tabata “sin precedencia.”
E National Institutes of Health tambe ta lansando un esfuerso nobo rond di menopausa y e tratamento di sintomanan menopausal cu lo identifica buraconan den investigacion y traha pa cera esakinan, segun consehero di e Cas Blanco Jennifer Klein. NIH ta funda un cantidad enorme di investigacion biomedico, imperativo pa compronde con medicacion ta afecta e curpa humano y pa dicidi eventualmente con pa prescribi medicina.
Algun condicion tin diferente sintoma pa hende muhe y hende homber, manera malesa di curason. Otronan ta mas comun den hende muhe, manera malesa di Alzheimer’s, y algun ta unico pa hende muhe—manera endometriosis, cancer uterino y fibroide descubri den e utero.
Y investigacion desigual tin efectonan grandi; un estudio di 2020 pa investigadonan na e University of Chicago y University of California, Berkeley, a descubri cu hende muhe tabata haya demasiado medicamento y ta sufriendo di efectonan di medicacionnan comun, pasobra mayoria di e pruebanan di dosis ta ser conduci solamente riba hende homber.
