(EFE) – Presidente di Merca, Joe Biden, a adverti ayera diamars cu Horcan Milton lo por ta e “pio” pa azota estado di Florida den un siglo y a pidi hende cu ta den ruta di e tormenta pa evacua lo mas pronto mas posibel.

“E por ta e pio horcan cu a dal Florida den mas cu un siglo y si Dios kier, e lo no ta, pero ta parce asina aworaki,” Biden a bisa reporteronan na Cas Blanco, djis despues di a anuncia cu e ta cancela un biahe pa Florida y Angola pa keda na Merca y supervisa e reaccion riba horcan.

Biden a bisa cu e impacto di Milton, cu ta spera di yega tera awe diaranson den oranan di anochi den e area di Tampa Bay di Florida, por ta “devastador.”

“Mi ta pidi tur hende den e caminda di horcan Milton pa scucha autoridadnan local y sigui medidanan di seguridad. Si bo ta bou di orden di evacuacion, bo mester evacua awor. Nan mester a evacua pa awor. “E ta un asunto di bida y morto y e no ta un exageracion,” Biden a bisa.

Centro Nacional di Horcan (NHC) di Merca a adverti den su boletin di 11:00 ora local di ayera cu “ta e ultimo dia pa residentenan di Florida prepara” na cas of evacua e areanan designa, si ta indica door di autoridadnan local.

Milton, un horcan cu a fortalece den tempo record den Golfo di Mexico pa alcansa categoria 5, esun mas grandi riba e escala di Saffir-Simpson, a keda baha ayera pa categoria 4 y ta anticipa cu su centro lo yega tera diaranson anochi cerca di Tampa Bay, Hillsborough Condado (costa west di Florida).

Joe Biden a dicidi di pospone su biahe pa Alemania y Angola pa vigila e preparacionnan cu ta ser haci pa e yegada di Milton.

Den un declaracion, e vocero di Cas Blanco Karine Jean-Pierre a bisa cu “mirando e trayecto y forsa di e horcan,” Biden ta pospone su biahe pa supervisa preparacionnan y contesta na Milton, ademas di e contesta continuo na e impactonan di horcan Helene den zuidoost di e pais.

Dia 24 di september, Cas Blanco a anuncia cu Biden tabata bay haci un biahe na october pa Alemania, cu tabata un aliado clave di Merca den e guera na Ucrania, y tambe pa Angola, caminda e tabata bay ta su prome bishita na Africa desde cu el a yega Cas Blanco casi cuater aña pasa.

E biahe lo a tuma lugar entre 10 y 15 di october, Cas Blanco a anuncia den un comunicado.

Faltando menos di un luna pa e eleccionnan presidencial dia 5 di november proximo, e horcannan a haci un impacto directo riba e campaña, mirando e respuesta gubernamental cu ta ser duna.