![Hurricane Beryl Impacts Texas Coastline](https://www.bondia.com/wp-content/uploads/2024/07/Beryl-a-laga-por-lo-menos-4-morto-y-2-miyon-cas-sin-coriente-den-su-paso-na-Texas-2_result-696x392.jpg)
(BBC) – Por lo menos 4 persona a muri despues cu horcan Beryl a asota e sur di Texas, lagando mas di dos miyon cas sin coriente y provocando yobidanan fuerte, inundacionnan y bientonan duro.
Dialuna ultimo, Beryl a yega na estado sur ora tabata un horcan categoria 1, despues a bira un tormenta tropical. Autoridadnan a adverti cu e sistema lo a provoca bientonan destructivo, ademas di yobidanan fuerte y mareanan di ciclon “peligroso.”
A cancela mas di 1,000 vuelo na e aeropuerto mas grandi di Houston.
Mientras tanto, oficina di gobernador di estado a pidi na residentenan pa no subestima e tormenta, cual dianan anterior a causa 10 morto durante su paso den Caribe.
Un homber di 53 aña y un muhe di 74 a muri den hechonan aisla, despues cu palonan a cay riba nan casnan debi na e bientonan di e tormenta. Prensa ta papia di dos morto mas.
Segun AccuWeather, ta straño cu un horcan di forsa mayor ta afecta Texas den epoca di aña aki. Den area di Houston e bientonan tabata di 120 kilometer pa ora. Ta spera cu e tormenta lo sigui perde su forsa na medida cu ta continua cu su paso, pero ta existi ainda riesgonan di inundacionnan y yobidanan intenso.
Pa e condicionnan di e tempo, tambe a emiti advertencianan di tornado pa algun condado di Texas y Luisiana. E wafnan di Corpus Christi, Houston, Galveston, Freeport y Texas City a cera, loke ta nifica cu por a suspende e exportacionnan temporalmente.
Mas di 2,000 rescatista tabata prepara pa enfrenta e consecuencianan di Beryl, incluyendo miembronan di Guardia Nacional di Texas. Ta anticipa cu Beryl lo sigui su caminda a traves di estadonan central di Merca, incluyendo Missisippi.
Beryl ta un tormenta sin precedente cu a bira un horcan di categoria 5, esun cu a forma mas lihe registra den Atlantico. Den Caribe a laga basta dañonan, afectando specialmente e islanan St. Vincent and Grenadines, Union Island y Grenada.
E tormenta tambe tabata un di e mas poderoso cu a asota Jamaica y a laga shen miles di persona sin coriente. Prome cu el a yega Texas, el a asota e costa west di Mexico.