Merca: Baby prematuro deteni na frontera

Un muhe hoben kende tabata sinta riba un rolstoel cu yen paña, tabatin un baby prematuro wanta. Un abogado di migrante a acerca pa mira su situacion, unda cu horror, el a nota e baby den brasa di su mama na luga di unda e mester ta: den cuido neonatal na hospital.

Hope Frye, boluntario di e grupo di defensa di migrante, ta biaha pa bishita facilidad di migracion cu mucha, asina e por ta sigur di cu hende ta cumpli cu regla federal. E ta bisa cu e baby cu a nace prematuro mester ta den un hospital ricibiendo tratamento cu monitor di curason.

Frye ta bisa cu e caso ta resalta e mal condicion cu migrante ta confronta cune ora nan crusa frontera. E mama, di 17 aña naci na Guatemala, a ricibi un cesarea di emergencia na Mexico na cuminsamento di mei. E tabatin un dolor extremo ora cu abogado a wake. E mama a bay hospital pero a sali bek, y Frye no ta sigur si e baby a ricibi atencion medico.

E mesun centro a obtene atencion internacional aña pasa, ora cu nan a cuminsa separa mucha di nan mayornan. E defensor ta describi e centro como un haula y ta ‘extremadamente friu’. E mesun luga ta unda a provoca un grie, cual a pone autoridadnan cera e facilidad.

Adminstracion di Trump ta enfrenta critica diario tocante e situacion den e centro di detencion di migrante. Cinco mucha a fayece desde fin di aña pasa den detencion. Migrantenan a wordo teni pafo pa largo bou di un brug na El Paso, den condicionnan deplorabel. Y un reporte di Inspector General luna pasa a haya sobrepoblacion den centro di procesamento di El Paso, cu 76 migrante den un cel diseña pa 12 persona. Investigadonan a mira migrantenan para riba e toilet pa por haya espacio pa hala rosea, pasobra tabata asina preta.

Inmigracion y control di frontera a bisa cu su agentenan ta abruma y no tin e fondo ni recursonan necesario pa maneha e situacion. Servicionan di Salud, e agencia gubernamental a cargo di cuida mucha sin guardian ora nan wordo libera di custodia di Inmigracion, a bisa cu nan a surpasa nan capacidad cu 13,000 mucha den nan cuido. E agencia tin plan pa añadi mas facilidad pa mucha na New Mexico, Texas, y un base militar na Oklahoma.