Un piloto cu mas di 7.000 ora di experiencia biahando den un B-17 tabata un di esunnan cu a fayece hunto cu su co-piloto y 7 persona, ora cu e avion a crash y kima na aeropuerto di Connecticut.
Piloto Ernest McCauley, di 75 aña di edad, di California, a yega di biaha pa mas di 20 aña. E avion, cu 13 persona abordo, a crash y kima despues di experimenta problema mecanico durante su lantamento diaranson mainta for di Bradley International Airport. Cinco pasahero a perde nan bida, hunto cu McCauley y e co-piloto, Michael Foster di 71 aña, di Jacksonville, Florida, segun Connecticut Department of Emergency Services and Public Protection.
Investigado a cuminsa busca evidencia, incluyendo e motor, unda e piloto a raporta un problema. E avion a pasa un inspeccion grandi na januari 2019.
Gary Mazzone, di 60 aña ta un di e fayecidonan, kende tin historia den cuerpo militar. Mazzone tabata un agente policial pa 22 aña. Robert Riddel tabata otro di e fayecidonan, su casa Debra Riddel, tabata na aeropuerto ora cu el a wak cu e avion a cuminsa faya. “Mi a sinti algo malo den mi stoma. Mi a djis sinti cu e avion ta bayendo abou”, el a bisa.
Ingeniero di avion, Mitchell Melton, 34 aña di edad di Texas, ta un cu a sobrevivi. 5 otro persona a sobrevivi cu herida. Bridgeport Hospital ta bisa cu un sobreviviente a yega den condicion serio y dos otro den condicion tratabel. Tur tres tin kemadura y weso kibra.
Sargento Chief Master, James Traficante, un airman cu e Connecticut National Guard, tabata riba e B-17. El a yuda otro pasahero pa sali for di avion uzando glove resistente na candela pa habri un escape.
E airman tin entrenamento pa maneho di emergencia den avion y a trece e glove pa e biahe den e B-17. Traficante a wordo trata den e hospital y ta recuperando na cas. “Nos pensamento y oracion ta pa tur esunnan afecta pa e accidente tragico”, Major general di Connecticut National Guard, Francis Evon a bisa.
