Comision Federal di Comercio (FTC) y Departamento di Husticia ta investigando acusacionnan cu TikTok no a logra cumpli cu su obligacion di protege privacidad di mucha bou un acuerdo di 2019, segun Reuters a reporta diamars.
Dos fuente a bisa e agencia noticiero cu nan a participa den diferente yamada cu agencianan federal tocante un acusacion cu e app popular di video no ta cumpliendo cu su promesa bou di e acuerdo pa loke ta trata privacidad di mucha.
TikTok ta un app di red social extremadamente popular, unda hende, mayoria adolescente y adulto hoben, ta post video di maximo 15 seconde, hopi biaha cu musica. E app a crece den popularidad den prome kwartaal di aña, registrando mas di 2 biyon download for di Apple App Store y Google Play Store, segun compania di analitica Sensor Tower a reporta na april.
Na mei, e Centro pa Democracia Digital, Campaña pa un Infancia liber di Comercial, y mas di un decena di otro organisacion a pidi FTC pa investiga acusacionnan cu e operadornan di e app a viola e Children’s Online Privacy Protection Act (COPPA) door di no elimina informacion personal tocante usuarionan bou edad di 13 aña, manera a acorda cu lo haci.
Na 2019, operadornan di e app a bay di acuerdo pa paga $5.7 miyon pa resolve cargonan di FTC cu a viola COPPA door di no obtene permiso di mayornan prome cu a colecta informacion personal di muchanan bou edad di 13 aña. TikTok tampoco a elimina e informacion personal aki na momento cu a ricibi keho di mayor- y muchanan, segun FTC.
Sinembargo, e app a ricibi scrutinio den lunanan recien. Legisladonan Mericano a acusa e app di ta un menasa pa siguridad nacional, y ehercito y marina Mericano a prohibi e app riba aparatonan di gobierno.
Den un entrevista cu Fox News dialuna nochi, Secretario di Estado, Mike Pompeo a bisa cu administracion di Trump ta na altura di TikTok y ta considerando prohibi e app. “Definitivamente nos ta evaluando”, Pompeo a bisa contenstando un pregunta. “Nos a traha riba e asunto aki pa hopi largo”, el a agrega, citando e prohibicion di e administracion contra gigante di ekipo di telecomunicacion Chines, Huawei.
