(Infobae) – Den un movemento cu a laga hopi observado politico tanto na Washintong como na Bogota sorprendi, Joe Biden, presidente di Merca, dialuna ultimo a anuncia un reduccion drastico den presupuesto di ayudo pa Colombia pa aña 2025.

E cifra solicita pa proximo aña fiscal, aproximadamente di 413 miyon dollar, ta marca un bahada notable compara cu añanan anterior y ta representa e cifra mas abou cu Biden a yega di duna for di dia el a yega na Cas Blanco.

E noticia a genera preguntanan riba e motibonan tras di e disminucion aki. Na 2023, administracion di Biden a solicita 413 miyon dollar pa Colombia, loke ta haci cu e reduccion anual ta di 7%. Sinembargo, loke a hala atencion ta e recorte di e fondonan destina na lucha contra droga, cu ta mustra afecta cu un disminucion di 15%, ora a pasa di 160 miyon dollar pa 135 miyon dollar.

E impacto di e reduccion aki no ta limita solamente na lucha contra narcotrafico, sino cu tambe ta extende na programanan di desaroyo na e pais. Na 2024, Congreso a ricibi un solicitud di 225 miyon dollar pa financia e programanan aki, mientras cu pa 2025, e cifra a keda reduci na 219 miyon dollar, esaki cu e suma di e cuentanan di Asistencia pa Desaroyo y Fondo pa Apoyo Economico (DA y ESF na Ingles).

Asina mes den ocasion aki, Biden a solicita un asignacion di mas di 38 miyon dollar pa Forsa Arma, 8.7 miyon dollar destina pa programanan di salud na nivel global, 10 miyon pa actividadnan di minanan y prevencion, y un partida adicional di 2 miyon pa desaroyo di educacion militar, cu ta bay ricibi cantidadnan chikito compara cu añanan anterior, di acuerdo cu loke e corant El Tiempo a señala.

Aunke e reduccion total di e presupuesto di ayudo pa Colombia no por ta considera catastrofico, ya cu e cifra solicita ta sigui keda considerable, ta importante pa destaca cu ta representa un tendencia baha den apoyo financiero di Merca pa e pais sur Americano.

Desde e 453 miyon dollar duna na 2022, despues 463 miyon na 2023 y 444 miyon na 2024, e solicitud di 413 a marca un punto di tension den e relacion bilateral entre ambos pais.

Embahada di Merca a pronuncia riba e presupuesto aki cu Biden a aproba pa Colombia den un comunicado oficial, e entidad diplomatico a indica cu e reduccion di presupuesto di e aña aki ta alinea cu e politicanan di Gobierno di presidente Petro y ta aborda di manera specifico e problema di migracion.

Den e comunicado, embahada ta destaca cu e recursonan solicita pa Colombia ta diseña pa promove un agenda comun centralisa den e construccion di paz, mehora di oportunidadnan social y economico na varios region di e pais, asina como haci impulso di transicion di comunidadnan rural pa actividadnan legal. Asina mes ta busca fortalece e resiliencia di e comunidadnan aki pa loke ta trata e impacto di cambio climatico y fomenta e conservacion di biodiversidad, reflehando asina e obhetivonan prioritario di Gobierno Colombiano.