(NTN24) – Gobierno di Merca ayera diabierna anuncia cu ta bay acepta referencianan di reubicacion di refugio di solicitantenan di asilo di Cuba, Haiti, Nicaragua y Venezuela cu ta na Mexico.
Di acuerdo cu asesor di siguridad nacional di Cas Blanco, Jake Sullivan, ta bay ofrece camindanan legal di migracion na esnan cu ta na teritorio Mexicano actualmente.
“Nos ta pidi e migrantenan pa usa e camindanan legal aki na luga di pone nan bida den man di contrabandistanan y traficantenan peligroso. Di conformidad cu nos leynan, esnan cu ta busca drenta ilegalmente na Merca ta bay enfrenta consecuencianan grave, incluyendo expulsion, posibel proceso penal y un prohibicion pa drenta back,” Sullivan a indica den un comunicado.
E anuncio a tuma luga despues di encuentro entre presidente di Mexico Andres Manuel Lopez Obrador cu un delegacion Mericano, lidera pa e asesor di siguridad nacional di Cas Blanco, Elizabeth Sherwood-Randall.
A traves di un comunicado, gobierno Mericano a sigura cu “ta bay acepta referencianan di reubicacion di refugiado di personanan califica di Cuba, Haiti, Nicaragua y Venezuela cu ta na Mexico caba.”
A diferencia di e mayoria di inmigrantenan cu ta solicita asilo despues di drenta Merca, refugiadonan ta ricibi un autorisacion di trabao mesora y prestacion di Gobierno, como ayudo pa cas y trabao.
“Awe nos ta anuncia nos apoyo total na un espacio internacional di varios uso cu Gobierno di Mexico ta planea establece na e sur di Mexico pa ofrece opcion laboral y di refugio nobo na personanan mas vulnerabel cu ta na Mexico actualmente.” E comunicado a sigura.
