Un candela a caba cu bida di 5 mucha na un centro di cuida mucha, unda cu muchanan por keda anochi si nan mayornan ta traha. E doño di e luga ta na hospital, autoridad ta informa.
Guy Santone, Hefe di e Departamento di Bombero a bisa cu e victima ta den edad di 8 luna te cu 7 aña. E candela a cuminsa 1:15am segun rapport. Valeria Lockett- Slupski a bisa cu e tabata wela di 4 di e muchanan, kende tabata den e crèche pasobra e mayornan ta traha durante anochi.
“Nos tur ta perdi, purbando di descubri con esaki a sosode”, Lockett- Slupski a bisa. E causa di e candela ta bou investigacion. Asociacion regional ‘The Erie Regional Chamber and Growth Partnership’ ta bisa cu ‘Harris Family Daycare ta un servicio pa cuida mucha 24 ora pa dia, 7 dia pa siman, incluyendo dianan di fiesta’.
Oficina di Desaroyo Infantil y Siñamento Trempan di Departamento di Servicio Humano a bisa cu a haci inspeccion dia 28 november 2018 na e luga. Den un nota dia 3 di januari 2019 a wak resto di sigaria na un area unda mucha ta hunga y area di traha cuminda.
Otro nota di e departamento di e mesun fecha a bisa cu tabatin plug accesibel pa mucha di 5 aña di edad of menos. Anto e contesta di ‘Daycare’ ta cu nan lo haci limpi e luga y lo cera e buraco pa conecta e cable ora nan no ta den uzo. E departamento a figura cu e problema tabata drecha.
