(AP) – E cantidad di donante di organo Hispano na Merca a aumenta den añanan recien, pero e aumento aki ta slow. Maske organo no ta match door di rasa y etnicidad, un gap significante ta keda entre donante y candidato pa transplante entre hende Hispano.

Como 15% di donante di organo na 2023 tabata Hispano, data federal ta mustra. Esey ta como un punto porcentual mas halto cu 10 aña atras. Sinembargo, te cu mita di april, casi 23% di e mas di 103mil candidato pa transplante riba lista di espera na Merca ta Hispano. De heco, 59% di candidato pa transplante ta hende color scur, Hispano of Asiatico.

Transplante entre hende di diferente rasa y etnicidad frecuentemente ta tuma lugar exitosamente, segun Dr. Ravi Dhingra, director medico di programa avansa di fayo cardiaco y transplante na Medical College of Wisconsin na Milwaukee. Pero tin un pool diverso di donante por hacie mas facil pa match nan cu un persona riba e lista di espera, segun e Administracion federal di Recurso y Servicio di Salud.

Parti di e motibo pakico hende Hispano por ta menos probable di dona nan organo por ta cultural, pero “mi lo bisa e ta mas un problema di confiansa,” Dhingra a bisa.

Pa yuda aumenta comprension, Dhingra y Dr. Hector Ventura, cabesante di seccion di fayo cardiaco y transplante di curason na e Oschner Clinic Foundation na New Orleans, ta contesta pregunta tocante donacion di organo.

 

Pakico donacion ta importante?
 Poni simpel, donacion di organo ta scapa bida, expertonan ta bisa. Dokter por transferi un curason, higra, pulmon of otro organo vital na un persona den necesidad. Cada donante por salba ocho bida y yuda otro 75 persona, segun HRSA. Aña pasa, un cantidad record di 46,630 transplante a tuma lugar na Merca di tur donante.

Por haci transplante di organo cu donante na bida of fayecido. Ta match organo cu hende riba e lista nacional di espera basa riba factornan manera tipo di sanger, tipo di curpa, y con criticamente enfermo un persona necesitando un transplante por ta. “Te cu awo, cerca di 20% di pashent ainda ta muri wardando pa un curason,” Dhingra a bisa.

Diversidad racial y etnico ta importante den transplante di organo?

Segun LifeSource, e nonprofit cu ta yuda hospital cu e proceso pa procura organo, tipo di sanger compatible y marcadornan di tehido ta mas probable entre hende di mesun etnicidad. Pues, un pool di donante mas diverso ta aumenta chens pa un match.

Hende Hispano ta como 19% di poblacion Mericano, pero ta enfrenta un riesgo desproporcionalmente halto di diabetes, obesidad, presion halto y otro condicion di salud cu por conduci na malesa di curason y fayo di organo, segun un rapport di CDC na 2015.

Pakico hende Hispano no ta donante?

Hende Hispano kende ta scoge pa no bira donante por falta confiansa den sistema di cuido di salud como resultado di acceso limita na cuido medico y e sentimento di wordo trata diferente pa profesionalnan di salud, Dhingra a bisa.

Tambe tin idea kiboca di donacion, manera e nocion cu por tuma organo sin permiso. Pero esey no ta berdad, el a bisa. Na momento di morto di un persona, si no haya nan den e registro nacional of estatal di donante, ta acerca nan famia of representante legal tocante e donacion.

Algun persona por no considera donacion pa motibo religioso. Pero Ventura a nota cu mayoria di religion mayor ta sostene donacion di organo.

Mester genera mas consciencia tocante donacion di organo entre poblacion Latino, particularmente den Spaño, el a bisa. “Si bo haci un campaña pa splica kico e ta, esey por cambia nan pensamento.”

Pakico Latino mester considera bira donante?

Segun HRSA, cada dia 17 persona na Merca ta muri wardando pa un transplante di organo. Donantenan di organo por “definitivamente yuda no djis un persona sino hopi pashent si e organonan di higra, riñon, wowo, curason y pulmon por ser dona,” Dhingra a bisa. “Hende mester pensa di dje den un manera cu nan sernan keri ta continua den curpa di otro hende.