Locual ta frustrante pa ambtenaarnan ta cu e sector cu nan ta traha aden, esta e sector publico, no ta funciona eficientemente. Nan ta bay trabou cu e miho intencionnan, pero door di procesonan ineficiente y burocratico nan no por produci manera cu nan kier. Mas aun nan no por brinda e servicio cu nan kier na e cliente. Mi ta kere cu e ambtenaarnan por comparti e experienca y sintimento aki cu mi, mi mes siendo un ambtenaar pa 17 aña largo caba. Cuanto biaha nos no a experencia cu cierto materialnan ta caba cu nos, maske cu a bestel nobo na ora, e material nobo no ta yega na ora. Nos kier cumpra material innovativo na mihor prijs pa haci nos trabou miho, pero no por cumpra esaki na e momento indica, door cu e procesonan existente no ta haci’e posibel.
Frustracion y ineficiencia
Aunke nos situacion financiero no ta bon, locual mi a describi den e alinea anterior, no tin di haber cu e echo cu no tin placa. E problema ta cu e proceso pa cumpra e materialnan aki al instante cu mester di nan ta mucho burocratico y ineficiente. Cuanto biaha ambtenaarnan no a haya nan mes ta cubri gasto ora nan bay un dienstreis of e daggeldvergoeding ta wordo paga ora ya caba bo a regresa di e dienstreis, simplemente pasobra e peticion cu ta wordo haci, no ta keda cla na tempo. Awendia, den un mundo dinamico e no por ta asina mas, cu e tipo di decisionnan aki mester wordo tuma via un sistema central, pasobra e ta ineficiente y ta causa frustracion cerca tur ambtenaar. Y e frustracion aki y ineficiencia ta resulta den un aparato cu no ta funciona optimal.
Sistema decentralisa flexibel
E sistema central cu ta caracterisa e aparato gubernamental ta haci’e incapaz pa organisacionnan por adapta liher na menasanan. Na otro banda e sistema central no ta haci’e posibel pa capitalisa riba oportunidadnan cu ta presenta na bienestar di tur ambtenaar.
E alternativa presenta aki pa soluciona e factor aki, e factor cu ta causa mas tanto frustracion pa ambtenaarnan ta un sistema decentralisa cu ta flexibel. Un sistema decentralisa lo haci’e mucho mas facil pa adapta na e situacionnan cu ta presenta y esaki ta beneficia tur ambtenaar. Por ehempel na Hulanda, ora un trahador mester di algo na e momento ey pa por ehecuta su trabou manera debe ser, den un investigacion penal por ehempel, su hefe por bay y cumpra e material na e momento ey p’e, sin cu esaki ta mara na burocracia.
Calidad di producto y servicio
Tin hopi ehempel caminda e sistema rigido y burocratico ta costa gobierno hopi placa, ta crea situacionnan peligroso pa ambtenaarnan y ta impedi e operacionnan diario (core-business) wordo haci na un manera optimal, y esaki cu tur e consecuencia pa e calidad di e producto produci of servicio brinda. Sin menciona e consecuencia pa cu e motivacion den e organisacion en cuestion. Pa duna un otro ehempel, mi ta kere tur ambtenaar ta di acuerdo cu mi cu hopi biaha partisipacion na cursonan den exterior of na Aruba, cursonan riba nivel y cu ta necesario y cu no ta costa hopi placa, no por bay door, debi cu e sistema ta ineficiente y nada no ta keda cla na tempo.
Rol importante di lider
Pa por logra e cambionan necesario, e rol di lider ta hopi importante. Pa por innova un organisacion y pone e organisacion excelera, semper ta wak e lider. E comportacion di un lider ta di sumo importancia pasobra e ta crucial pa e organisacion por sobrevivi den un mundo caminda cu e clientenan tin expectativanan halto di e organisacion (Fechter & Horrowitz, 1991). E importancia di e rol di e lider ta wordo enfatisa den teorianan di “organizational support” cu ta indica cu e trahador su prestacion, ta depende di con nan ta wak cu e organisacion (e lider) ta balora nan. Si esey ta e caso den un organisacion, e no lo ta e caso tambe den e relacion entre e departamento concerni y su ministerio? Si un organiscion kier excelera y innova pero ta wordo impedi den esaki door di e sistema centralisa, nos no lo mester wak e ora e gobernantenan y haci nos mes e pregunta ta dicon no kier decentralisa?
Mi kier a haci e comparacion aki pa por enfatisa e importancia di tin lidernan riba e nivel mas halto (gobernante y/of parlamentario) di nos aparato gubernamental cu kier trece cambio, pasobra sin cambionan fundamental den sector publico, niun organisacion gubernamental no lo por eleva na e nivel maximo.
Vision y curashi pa trece cambio
Si pueblo kier un aparato gubernamental flexibel y dinamico, cu por adapta su mes liher na e desafionan interno y externo, na e demanda di pueblo, y cu por di berdad kita e factornan cu ta molestia e ambtenaar nan, pueblo mester asegura cu e lidernan maximo cu nan ta vota pa representa nan, tin e vision aki y tin e curashi tambe pa bin cu e cambionan aki. A bira ora pa lidernan bay ehecuta e vision caminda e organisacionnan den sector publico tin e autoridad pa tuma decision directo riba tur aspecto cu ta concerni nan operacion diario. Dimes e organisacionnan mester wordo wanta responsabel tambe pa tur resultado. Pero ta solamente ora bo tin e autoridad pa tuma decision bo por wordo wanta responsabel. Y esaki lo wordo introduci atraves di un Management & Control cyclus, caminda cu cada pasa tanto tempo e organisacion lo responsabilisa su mes cerca e gobernante en cuestion Asina aki toch
‘good governance’ ta wordo garantisa y e problema no ta wordo simplemente aplasa.
Cultura di poder
E sistema decentralisa ta bay haci’e posibel pa lidernan den e organisacion directamente tin autoridad pa tuma decisionnan al instante riba recursonan financiero, adkeri materialnan necesario inmediatamente y recluta e personal necesario. Dimes esaki lo mester bay atraves di un presupuesto cu ta wordo defini al principio, caminda ta garantisa cu e presupuesto no lo wordo surpasa. E ultimo punto di biaha tambe ta bay incorpora den nos sistema cu solamente funcionnan cu ta realmente necesario ta wordo yena cu personal, es decir un maneho di recluta personal mucho mas transparente y eficiente.
Pa contesta e pregunta cu mi a haci na comienso, dicon no kier cambia e sistema anto? Cambio semper ta trece inkietud, mas aun ora tin un cultura caminda e sistema centralisa ta wordo protegi, mirando cu e ta duna e gobernante un tipo di “poder”. Ora ta algo positivo ta sosode, ta e gobernante a haci’e posibel, pasobra e decision a wordo tuma, of mas bien e peticion y tur e documentonan necesario, a wordo firma door di e gobernante. Pero ora ta trata algo negativo ta wak bek riba e organisacion, pasobra e gobernante ta tuma desicionnan strategico so diripiente.
E cultura aki lo impedi innovacion y eficiencia y pesey ta importante pa kibra e cultura aki y alaves e ta enfatisa e importancia di tin un parlamento cu ta critico y habri pa cambio, no obstante e color di partido cu ta na mando.
