Recientemente partido MEP (Movimiento Electoral di Pueblo) tambe a presenta su plan di gobernacion 2025-2029. Partido MEP, cu actualmente ta forma parti di gobierno (awor demisionario) a presenta un plan di partido cu ta consisti di 16 capitulo cu ta elabora riba diferente topico y ta enfoca riba siete punto di prioridad.

Como partido den gobernacion desde 2017, e plan di partido di MEP ta dirigi riba continuacion den gobernacion y ta enfoca riba “consolida e progreso haci durante e añanan cu a pasa”.

“Cu wowo riba e principio di “Un Pais Resiliente y Innovativo,” e plan aki ta enfoca na fortalece abo, e ciudadano, den tur manera posibel pero si na un forma responsabel y integro. E fundeshi di e plan aki ta mantene e enfasis riba integridad den gobernacion. Nos lo sigui fortalece transparencia, responsabilidad y confiansa publico door di un servicio publico eficiente, uzo responsabel di recursonan financiero y material, y un bon maneho fiscal,” e documento ta señala.

Poniendo enfasis riba educacion, salud mental y proteccion social nos, MEP a presenta un programa extenso cu ta subraya su experiencia den gobernacion y ta pone bista riba continuacion pa e siguiente periodo di gobernacion.

Den e plan di partido MEP ta resalta siete punto di prioridad cu ta consisti di reduci costo di bida, mehora poder di compra di ciudadanonan, salud, enseñansa, mehora condicionnan laboral, pensionadonan, barionan y desaroyo sostenibel.

Costo di Bida

No ta un secreto cu costo di bida ta un tema di preocupacion pa mayoria ciudadano na Aruba. Pa mehora esaki MEP kier amplia e canasta basico aun mas, kier crea mas conscientisacion pa control di prijs, habri posibilidad pa importa carni y galiña for di Colombia y yuda comerciantenan baha nan gastonan di importacion, locual na su turno lo baha e gasto di producto

Mehora poder di compra

Pa mehora e poder di compra di e ciudadanonan MEP ta inclui den su plan di partido sigui aumenta pensioen, sigui aumenta salario minimo, sigui aumenta onderstand pa esnan cu limitacion, sigui baha tarifa di loonbelasting, incluyendo overtime, baha tarifa di coriente y introduci un subsidio (‘energie toeslag’) pa famianan den necesidad no keda sin awa ni coriente, introduci un subsidio (‘creche toeslag’) pa mayornan cu tin yiu cu ta bay crèche y construi mas vivienda social y vivienda pagabel

Salud

Pa loke ta e sector salud, e partido ta remarca cu nan kier trece innovacion den cuido pa haya cita cu dokter y resultado di testnan mas lihe, elimina listanan di espera den specialisacionnan mas necesario, amplia e servicionan pa salud mental cu ta ser duna door di Respaldo y Stichting Hunto cu mas psicologo, enfoca riba prevencion di salud mental y explora e posibilidad pa AZV cubri esaki, y laga AZV cubri remedinan di pensionadonan atrobe.

Enseñansa

Como un di e puntonan di prioridad, den nan plan di partido 2024-2029, den e siguiente gobernacion MEP kier haci enseñansa accesibel pa tur mucha y hoben, elimina schoolgeld pa scolnan kleuter y scolnan basico pa famianan cu ta den necesidad, nan kier ofrece subsidio pa famianan vulnerabel y cu tin entrada cu no ta halto, cu tin yiunan cu ta bay scol avansa, pa ‘boekengeld’ y calculatornan y esaki, nan a subraya ta bay conta pa tur scol avansa.

E punto aki ta inclui tambe mehora structura di cuido pa docente- y studiantenan na tur scol, adapta e curiculum di enseñansa usando digitalisacion y crea espacio pa studiantenan desaroya, inclui cultura mas ainda den enseñansa y crea e posibilidad pa enseñansa personalisa.

Mehora condicionnan laboral

Pa mehora e condicionnan laboral, MEP ta splica cu nan kier sigui aumenta salario minimo, kier empodera trahadonan riba nan derechonan y asisti nan den ricibi e proteccion di nan derechonan, kier fortalece proteccion laboral y intensiva control, explora e aparato gubernamental, introduci e posibilidad di traha un dia pa siman for di cas, sin cu esaki tin efecto riba e servicio of productividad den forma negativo, explora e cantidad di oranan di trabao semanal, manteniendo e mesun entrada, y con por introduci siman di cuater dia di trabao nada mas.

Pensionadonan

E tema di pensionado ta uno cu ta den e plan di partido di casi tur partido. Den su plan di partido MEP ta resalta cu nan kier sigui aumenta e pensioen di biehes na forma responsabel, sigui baha e peso di impuesto riba pensioen, mehora e cuido pa e adultonan mayor, pa por duna cuido di calidad y mas structura, na cas y den casnan di cuido, y crea mas casnan di cuido, y nan kier mehora cuido di salud di e pensionadonan, y amplia e ekipo di dokter geriatra.

Barionan

Den su plan di partido MEP ta enfoca tambe riba infrastructura di camindanan den barionan ty kier asfalta e camindanan y ta bay financia a traves di creacion di un ‘investeringsfonds’ y pone luz di caminda pa mas siguridad. Nan kier combati e problema di cacho riba caya y cu no tin doño, combati e sushedad cu tin riba Aruba enfocando riba campañanan di conscientisacion pa tene Aruba limpi, acopla cu multa pa esnan cu ta sigui susha Aruba, reduci e tarifa di esnan cu tin cu benta sushi afo y pone baki den tur bario, disponibel tur dia, sin costo adicional.

Desaroyo sostenibel, balor halto y impacto abao

E punto di prioridad aki ta inlcui no mas construccion di hotel. E partido ta resalta cu e desaroyo mester bay den balansa cu conservacion di naturalesa, miranod cu 59% di Aruba ya ta area protegi pa ley y e enfoke ta pa mantene esaki pa e futuro generacionnan

Pa por realisa nan programa MEP a presenta tambe den nan plan di partido con esaki lo ser carga door di presupuestonan 2025-2029. E punto di salida di e plan di e partido ta keda mantencion di e normanan financiero acorda dentro di ley.

E partido ta destaca cu debi na e espacio financiero cu ta ser crea lo cuminsa nan lo duna back na pueblo manera treci dilanti den e programa y e puntonan di prioridad di partido. Esaki ta ser mira den e fondonan relaciona cu subsidio y traspaso local y credito cual lo ser destina entre otro pa e adultonan mayor, studiantenan cu no tin e forsa financiero pa cumpli cu pagonan escolar y esnan cu ta ricibi sosten social. Hunto cu esaki MEP lo cuminsa inverti mas pa cumpli cu deseonan di e pueblo.