Un carta di alto comisario pa Fundacion Ir. Cesare Terzano riba un peticion nenga pa tene un parada riba e ultimo diadomingo prome eleccion, a conduci na un caso den corte.
Segun lider di MEP Evelyn Wever Croes ta bisa Bon Dia Aruba nan a entrega un peticion y ta pendiente di un fecha ainda pa tratamento dilanti hues. E peticion ta pa declara e carta cu e decision di prome minister pa tene un parada, nulo. Esaki pa motibo cu e partido a pidi e parada di auto prome cu AVP.
E carta ta splica mas di e caso aki. Riba 4 di januari e fundacion menciona ta pidi un permiso pa MEP tene un parada riba 17 september. Sinembargo riba 8 september minister di Asuntonan General (prome minister) a notifica cuerpo policial por medio di un carta cu solamente ta permiti AVP pa tene un parada di auto riba e diadomingo ey. Asina alto comisario Dolfi Richardson ta informa e fundacion/MEP cu lo nenga nan peticion.
Manera Bon Dia Aruba a publica caba na comienso di e luna aki, cuerpo policial a dicidi di tira lot pa dicidi ken riba cua dia por tene un parada, y sigur riba e ultimo diadomingo prome eleccion. Como cu e dia aki semper ta uno cu cierto partido politico (sigur MEP y AVP) ta prefera. Asina e cuerpo kier evita un discusion manera a pasa na 2013 ora MEP a protesta tambe pa motibo di tratamento preferencial di e partido den gobierno, esta AVP.
Bon Dia Aruba a purba di haya un reaccion di cuerpo policial pero te awor nan no a duna un reaccion. Prome minister Mike Eman awor ta na St. Maarten y nos tampoco a logra di haya un comentario for di su departamento.
