Gobernador ta den e segundo fase di nombra un informador, kende mester sondea e posibilidadnan pa un gobernacion. Bon Dia Aruba a entrevista lider di partido MEP Evelyn Wever Croes riba kico nan ta mira como posibilidadnan. “Pa awor nos ta considera un gobernacion cu POR y RED.” E ta bisa cu nan no a sinta na mesa ainda wardando e decision di gobernador pa nombra e informador. Tin contacto in oficial si; el a yama POR, RED y RAIZ despues di e resultadonan di eleccion pa felicita nan.
Pero no cu a cuminsa delibera caba pa yega na un acuerdo di gobernacion, sra. Wever Croes ta bisa. E ta menciona dos punto unda su partido no por tira biña den awa: corupcion y financia publico. Nan kier sigui cu e investigacionnan den gobierno pa corupcion ta sigui, e ta conta. Si e ta premira problema cu nan tambe a denuncia
lider di POR Otmar Oduber den pasado, e ta comenta: “Nos a hasta bringa e decision di Ministerio Publico den corte, pero hues tambe a bisa mescos cu OM cu esaki mester
wordo haci den parlamento.” Si MEP ta bay goberna, nan kier pidi Hulanda tambe pa ayudo den forma di laga WODC atrobe haci un investigacion den e aparato gubernamental. Pa financia publico, e meta ta pa mustra Hulanda cu Aruba por structuralmente drecha su financia publico, sra. Evelyn Wever Croes ta indica. Pasobra e gobierno anterior a drecha mas tanto ad hoc, di bende edificio aki, y haci kwijtschelding aya, e ta splica. Pero structuralmente nos no a mustra cu nos ta mehora nos financia, e ta bisa, y asina pa Hulanda e no ta suficiente pa duna e luz berde pa Aruba por fia mas barata bou garantia di Hulanda, cual ta hopi importante pa baha e deficit structuralmente
como e gastonan di interes ta e causa principal cu Aruba no ta logra di sali for di e
cifranan cora.
Zakenkabinet
Den caso cu no ta logra forma un gobernacion cu POR y RED, como RED no kier, sra.
Wever Croes ta bisa cu lo purba di sigui cu POR so. Den e caso esaki no ta logra nan no
ta descarta pa evalua un zakenkabinet. Pa un gobernacion di minoria, e lider di MEP ta
bisa, cu esey ta algo hopi dificil pa Aruba. Pa haya sosten den oposicion, no ta facil y ta haci gobernacion dificil tambe, como cu e sosten por varia por ehempel dependiendo ki topico of iniciativa di ley cu ta trece pa discuti den Staten.
Instigacion prome minister
Ayera MEP a manda un relato tambe unda sra. Wever Croes ta bisa cu a pidi pa un ‘investigacion na e instigacion di prome minister Mike Eman y presidente di parlamento Mervin Wyatt-Ras, pasobra instiga hende pa actua contra autoridad ta un crimen cu tin 5 aña castigo riba dje’. “Locual mi ta lamenta ta cu oponentenan politico cada dia ta inventa cantidad di rumor cu e unico intencion pa frustra e intentonan pa nos forma un coalicion.
Nan no kier un otro gobierno, pasobra nan tin miedo di investigacion. Pero nan tambe
mester compronde cu pueblo a papia cla y pueblo a rechasa e forma di intimidacion y
manipulacion cu nan ta hiba campaña. P’esey tambe mi a pidi un investigacion na e instigacion.”
“Mi ta haci un apelacion na un y tur pa nos keda calmo, cu cabes friu. Esaki ta un proceso
cu ta relativamente nobo pa Aruba y nos mester tuma nos tempo pa hacie bon.”
