— Den e programa ‘Al Caso’, parlamentario di partido MEP Glenbert Croes a declara cu e partido mas grandi den oposcion lo kita su sosten pa e amienda cu ta regla ‘geregistreerd partnerschap’ den codigo civil. Un confirmacion di esaki for di lider di partido sinembargo no a sali.
Segun Croes, riba su recomendacion e fraccion lo bay ‘tranka’ e invoeringsverordening di e codigo civil. E politico, bisando cu e ta papiando na nomber di fraccion y partido MEP a declara cu e decision pa sostene e amienda di consensus pa introduci union civil, haciendo e posibel asina pa entre otro parehanan di mesun sexo formalisa nan relacion y haya cierto derechonan cu parehanan casa tambe tin, tabata ‘un eror’. Croes, cu mes tambe a vota na fabor di e amienda di consenso, ta bisa cu esaki tabata un eror, ya cu cantidad su sostenedornan no a aprecia cu e partido a vota na fabor di e amienda di consensus. Pasobra e amienda a wordo traha na ultimo momento, MEP lo no tabatin e chens pa discuti e posicion cu nan achterban. Croes ta bisa cu si nan lo tabatin e chens pa tene e discusion ey, nan lo a compronde cu nan votadornan lo tabata contra di e amienda. Despues di e votacion, hopi di e militancia bieu di MEP a declara nan disgusto, particularmente cu lider di partido Evelyn Wever-Croes. Segun Glenbert Croes, MEP tabata e unico cu a sufri daño politico pa su sosten di e amienda, mientras cu AVP a djis keda keto.
Hopi tabata e comentarionan riba social media despues di e transmision di e programa cu a wordo graba diabierna. Cantidad di hende no por a compronde con e partido cu a yuda traha e amienda aki despues cu e notitie van wijziging cu tur tres partido den Staten a traha riba dje a wordo para, diripente a cambia di opinion. Riba dje e anuncio di Croes ta indica un direccion completamente oposito na e posicion cu lider di partido geel a declara y a defende den su seno. Te na e momento aki, Evelyn Wever-Croes no a duna ningun declaracion, confirmando loke Glenbert Croes a bisa. Na dado momento, for di fuentenan yega, Bon Dia Aruba a haya di compronde cu den e propio partido mes y serca e lider, e declaracion di Glenbert Croes lo a cay manera un baño di awa frieu. Den e siman cu ta bin lo ta bay ta hopi interesante pa mira kico e desenlace lo bay ta di e declaracionnan di Glenbert Croes.
