Ayera atardi nos a logra sinta un rato cu lider di partido MEP, Evelyn Wever Croes na cede di e partido na st. Cruz riba su reaccion di e resultadonan di eleccion. Nos a puntr’e entre otro tocante coalicion cu partido POR y logra combersa cu algun otro candidatonan tambe. Nan a core un parada ayera pa gradici e comunidad pa e sosten cu nan a haya.

Ayera partido MEP a core un parada cual riba rednan social varios hende a comenta pakico tin parada di victoria si ningun partido a haya voto mayoritario. Esaki tabata mas bien un parada pa gradici e sostenedornan segun lider di e partido a splica Bon Dia. “Nos ta hopi contento y satisfecho cu e resultado di e eleccion. E no ta exactamente locual cu nos a pidi, pero nos ta sumamente satisfecho y agradecido pa locual nos a haya,” sra. Wever Croes a bisa.

E partido a crece cu cinco mil voto, cual ta haci cu nan ta un partido di 22.000 votador y 9 asiento den parlamento. Riba caya ayera POR a mira cu varios simpatisante di e partido geel tabata den bon ambiente di celebracion. Tocando instrumento y cantando banda di caminda POR ehempel na rotonde di st. Cruz. POR a tuma nota tambe algun simpatisantenan di partido POR cu tabata para na banda di caminda ta celebra cu e partido geel. Sra. Wever Croes a sigui bisa nos: “Ora bo wak e resultadonan, e pueblo a vota pa un cambio y vota contra corupcion. E pueblo a vota pa pone ordo na e desordo cu tin riba e pais aki.” Number dos riba e partido geel, Xiomara Ruiz-Maduro a comparti cu Bon Dia cu: “Nos a yega na nos fundeshi di semper, y nos ta cla na e manera aki pa nos por traha riba nos cas Aruba. ” El a sigui bisa: “Nos crecemento a trece miedo den nos contrincante pasobra e lider politico di nos contrincante ta bay cas. E ta tira e serbete den tarima, pues tur esey ta cosnan cu bo tin cu tene na cuenta y celebra. Den e sentido sigur pa nos como partido cu nos a yega na nos asientonan. Nos a haya e confiansa atrobe.”

Formacion di gobierno
E partido geel no ta e partido mas grandi, kiermeen nan no ta e prome yama pa tuma accion pa loke ta trata formacion di gobierno. Esaki ta algo cu ta partido AVP, den e caso aki e partido mas grandi den voto, mester carga manera responsabilidad. Evelyn: “E lider di AVP a laga sa cu e no ta bay carga e responsabilidad aki. Dialuna e gobernador ta spera cada lider politico separa y nos lo bay tende di dje riba kico ta e deseo cu e lo tin pa nos mira con e formacion ta bay tuma luga.”

Conseho pa tene cuenta cu coalicion
Varios comentario riba rednan social incluyendo di ex lider di e partido geel Nelson Oduber a conseha pa tene cuenta cu un coalicion cu partido POR. “Nos ta hayando conseho di mas banda pa no forma coalicion y nos ta hayando hopi conseho tambe pa nos forma e coalicion,” sra. Evelyn ta comenta. E ta bisa cu nan a haci un evaluacion durante un partijraad urgente diasabra. Nan a evalua tur e pro y contra, y partijraad a conseha pa sigui cana e caminda si apelacion keda haci riba nan pa haya e encargo. “Aruba no POR cu cuater aña mas di AVP. Mi ta compronde esnan cu ta preocupa ta bisa cuidao cu den e proceso MEP bolbe kibra y bolbe cay atras. E ta un riesgo grandi y e lo ta un dolor grandi,” sra. Wever croes ta bisa.
E ta enfatisa cu na momento cu nan compromiso ta cu pueblo di Aruba. “Nos ta hendenan cu tin experiencia den politica. Nos tin hopi consehero cu ta conseha nos. No ta asina cu bo ta bay haya un partido ta bay come nos den esaki. Partido MEP tin hopi mas aña di experiencia y mi no tin ningun temor cu nos ta bay perde den e proceso aki. ” E lider di e partido ta bisa Bon Dia cu nan ta mastanto hayando conseho pa tene cuenta pa forma coalicion cu POR. “Pa ta alerta y atento cu esaki no POR ta un trampa entre AVP cu POR. Cu POR tin agendanan scondi. Tur esey nos ta tene na cuenta cu ne na momento di tuma un decision definitivamente.”

Prioridadnan di MEP: ‘Pueblo a pidi un coalicion’
E deseo di e partido geel ta pa cuminsa traha mesora riba e tema di haci Aruba mas sigur segun sra. Wever Croes ta bisa Bon Dia. Baha costo di bida, traha riba cuido di salud y mehora calidad di enseñansa.

“Mes momento nos tin cu atende cu e tema financiero. P’esey nos ta bay mesora di nuebe pa shete minister y ta bin placa riba mesa e ora cu por haci inversionnan den areanan menciona. Pero aworakinan nos prome atencion mester ta con e siguiente gobierno ta bay ta. Si MEP ta parti di dje, e ora nos mester yega na un acuerdo di gobernacion.” Sra. Wever Croes ta finalisa: “Pueblo a pidi coalicion. Nos a pidi un mandato cla anto nos POR a yega traha di biaha. Pero pueblo a pidi un coalicion, anto esey kiermeen cu mester yega na un acuerdo di gobernacion. A base di esey e prioridadnan ta bay. Nos tabata tin puntonan riba agenda pa un acuerdo pa yega na un coalicion ta cosnan importante: integridad y bon gobernacion mester ta e tema principal y pone ordo den e desaster financiero cu nos tin na Aruba. E dos puntonan ey ta crucial.”