Prome minister di pais Aruba, Evelyn Wever-Croes, den su prome discurso den reunion publico pa trata e presupuesto supletorio, a menciona diferente retonan cu Gabinete WeverCroes a hay’e confronta cu ne na inicio di nan entrada den e gobernacion di coalicion aki. E prome reto grandi cu Gabinete Wever-Croes a hay’e confronta cu ne ta e crisis financiero di nos pais. Unabes cu e cifranan real a keda conoci y cu no por a sconde mas e embergadura di e problema financiero cu gobierno anterior a causa, e realidad amargo a bira conoci di e deficit nacional gigantesco cua ta wordo trata den Parlamento e siman aki prome cu ciere di aña. Gobierno di Aruba kier cumpli cu e trayectoria pa bay na un presupuesto balansa y cu e normanan cu ta poni den e ley di LAFT.
Gobierno kier sanea e situacion financiero. Pero nos tin un dilema pasobra nos ta na haltura cu lo no ta facil. Pero nos ta trahando riba un plan y pronto Gobierno lo presenta na parlamento e vision di Gabinete WeverCroes tin pa yega bek na un presupuesto balansa a base di cifranan realistico. Compromiso di Gobierno ta pa sanea e situacion financiero sinembargo manera cu Gabinete Wever-Croes a indica cu manera cu a drenta den gobierno, nos a wordo confronta cu un otro crisis cu a pone henter e pueblo realisa cu e ser humano no por sigui wordo neglisha. Un crisis cu a laga un dolor grandi atras cu e morto di dos criatura Rishandroh y Eugene causa door di abuso fisico. Desde e momento di e acto horibel aki, henter e enfasis di atencion di henter Aruba a cambia. E gobierno anterior a kere cu financieramente por a atende cu e retonan di nos pais, pero awo e pueblo henter sa cu nos mester atende cu e ser humano prome.
E plan di gobernacion di Gabinete Wever-Croes ta pa yega na un presupuesto balansa creando espacio pa atende cu e ser humano y e retonan nos dilanti. E tema di problemanan social ya no por wordo yama asina sino awo nos ta trata cu un explosion social. Den Conseho di Minister esaki a wordo trata di inmediato bou guia di minister di Asuntonan Social y minister di Husticia. Hunto a bin cu un task force pa un plan di emergencia cu ta cay bou di Minister President pa enfatisa e seriedad cu esaki tin pa Gabinete Wever-Croes. Prome Minister ta bisa cu a pesar di tur e retonan aki, e pueblo por a sinti e biento di cambio den tur skina. E ser humano ta hayando mas atencion. Orden y respet ta wordo implementa. Speransa y confiansa ta wordo fomenta. Y ta e bientonan di aire fresco aki ta loke lo crea e fundeshi pa e cambionan grandi cu mester bin den e proximo añanan.
