MEP – A cuminsa campaña masalmente caba

Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta. Nos lo bini cu entrevistanan bayendo mas profundo den e vision di cada partido. Den e manera aki abo como votador por keda informa y tin un bista mas amplio pa yuda bo cu bo decision di voto. Awe nos ta continua cu e partido Movimiento Electoral di Pueblo (MEP).

MEP – A cuminsa campaña masalmente caba
Lider di fraccion MEP, sra. Evelyn Wever-Croes: “Nos ta preparando hopi intensivo.  Ya desde aña pasa nos a prepara nos plan di campaña y nos a cuminsa traha riba candidatonan nobo. Nos programa di campaña, e solucionnan cu nos ta brinda pa Aruba tambe ta kedando cla y ta falta ultimo detayes.” Nan ta subiendo caya caba y puntrando pueblo kico pueblo mes kier mira como solucion. Materialnan tambe a cuminsa yega y e materialnan mas grandi ta na caminda segun sra. Evelyn.  “Ya caba den luna di maart nos a cuminsa masalmente. Esey kiermen tur candidato hunto cu tur e campañadornan cu un grupo di mas cu cien hende. Nos a cubri un parti grandi den Savaneta. E luna aki Noord ta riba e lista, St. Cruz tambe y otro luna nos ta sigui cu San Nicolas, Playa, Paradera y mas. ” Fuera di e entradanan masal manera cu nan ta yam’e, cada candidato tin rutanan cu ta asigna na dje.

Hende mes ta acudi
Sra. Evelyn ta subraya cu seguramente e parti di seguridad durante campaña ta algo pa tene cuenta cune. Evelyn: “E cambio mas grandi den e campaña aki no ta tanto nos, sino con e pueblo ta responde na nos. Y esey tambe ta influencia nos strategia. ” E ta sigui bisa cu: “Pa nos ta hopi sincero, cuater aña pasa e hendenan tabata hopi mas inclina den direccion di e gobierno aki. Aworakinan unda cu nos bay hende ta pidi nos cambio, sea grandi of chikito.” Pues e ta bisa cu aworaki hende mes ta acudi cerca nan caminda cu awo ta haci cu nan no mester uza e mesun strategia di ultimo eleccion “Hopi hende mes kier trece nan puntonan pa dilanti, nan tin pregunta y sa kico a bay malo pero nan kier tende solucion.”

Criminalidad por ehempel sra. Evelyn ta bisa cu ta un tema hopi preocupante cerca mayoria di hende. “Sinceramente, for di tempo di nos tempo cu nos ta mucha tin criminalidad na Aruba. Ta e inseguridad cu hendenan ta sinti na Aruba aworaki tin hende preocupa. Bo no ta sigur na bo cas y te hasta trabao pasobra awo hasta hulpbestuurskantoor ta wordo atraca.”

Prioridad ta siguridad
Sra. Evelyn a comparti un poco cu nos un parti di nan plan concreto pa por ehempel combati criminalidad riba nos isla. “E prome cos cu nos ta haci ta segura nos costanan. Unabes cu nos costanan ta segura nos ta pone ordo paden di cas. Si bo no pone control na bo costanan, ta awa bo ta hiba lama. Si no tin control ken ta drenta y cu kico ta drenta, bo no lo por pone ordo paden nunca. ” E ta bisa cu nan lo bin bek cu e radar y helicopter cual el a subraya cu: “eseynan ta bin lihe bek. Nos ta duna guarda nos costa poder y autoridad, y duna nan material pasobra e pobernan ni uniform nan tin, nan no tin arma, nan no por traha.” Institutonan y instancianan cu ta trata cu criminalidad manera KIA, Cuerpo Policial , C.E.A. mester semper tin suficiente hende y material pa nan por haci nan trabao segun sra. Evelyn. “Nos ta bay percura pa e sensacion di seguridad drenta Aruba bek inmediatamente cu nos drenta den gobierno. Esey ta nos top prioridad como despues naturalmente tin e tema di costo di bida, control di e prijsnan como tambe pensa den un cooperativa pa trece fruta y berdura mas barata na Aruba.

Video di entrevista cu sra. Evelyn Wever-Croes