E aña aki, partido MEP a dicidi di cera nan campaña politico di un forma diferente cu den pasado. Of a lo menos diferente di e forma tradicional cu ainda otro partidonan ta realisa cu parada. Nan a dicidi bin cu un gesto di solidaridad y ayudo.
Diadomingo anochi na sede di candidato Sharlene Starke, kende ta wordo concidera di bira e minister di enseñansa pa partido MEP segun comentarionan den nos comunidad, nan entrega na Cruz Cora Aruba un suma di 8.500 florin pa yuda e hendenan na St. Maarten. Tambe MEP entrega como donacion 8.900 florin na fundacion Briyo di Solo. E donacion aki ta producto di nan ultimo rifa y otro actividadnan. “Nos sa cu tin hopi hende ta pasando momentonan hopi dificil y nos ta spera di curason cu esaki por trece un tiki alivio”, asina lider di MEP, Evelyn Wever-Croes a declara.
Accion di colecta
Partido MEP a dicidi pa nan miembronan y simpatisantenan mustra nan solidaridad y ayudo pa alivia e situacion dificil cu nos ruman den Reino Hulandes, esta St. Maarten ta pasando aden despues cu horcan Irma a ocasiona dañonan severo den e isla aki. Tambe nan a uni forsa pa yuda e fundacion Briyo di Solo, despues di un caso di candela cu a causa basta destruccion den algun di nan facilidadnan. Esaki a pone cu nan clientenan cu ta hendenan special no por bay den e traimerdia aki.
E actividad di recaudacion di fondo ta un forma pa “duna bek na comunidad”, asina el a declara. Cuatro aña pasa nan a yega di haci pa prome biaha un accion pa recauda fondo pa fundacion Nos Comunidad. E biaha aki nan a dicidi di yuda den dos suceso cu a conmove nan mes y nos comunidad.
Durante e fin di siman partido MEP a bin cu e accion di colecta di fondo cu un nomber hopi singular: Accion Yuda Sin Miedo. E accion aki a cuminsa diabierna den e sede di nan candidata Daphne Lejuez y diadomingo a continua henter dia pa medio di nan hobennan di nan hala hubenil HOT. Nan tabata den diferente sitionan strategico rond di nos isla pa tuma donacion. Nan a recauda 2.500 florin riba caya den diferente districto y bario. Tambe partido MEP a haci un extra donacion di 2.500 florin y e candidata Lejuez di su actividad a logra 1000 florin adicional.
Campaña 2017
Bon Dia Aruba a papia tambe cu sra. Wever – Croes riba con e campanja a bay pa MEP e eleccion aki. E ta comenta cu ‘campaña politico den general a bay miho cu cuater aña pasa’. E lider di MEP ta splica cu nan por sinti cu tin un cambio positivo den nos hendenan. Segun e, nan ta mas habri pa scucha e proposicionnan di e partidonan politico independiente di nan color. Tambe el a sinti cu nan por a yega mas cerca di mas hende.
E ta haya un gesto bunita den e campaña aki ora nan a bay bishita den cas y e hendenan tabata receptivo pa scucha bo mensahe. Esaki independiente di e color di bandera politico poni dilanti di e cas. “Si tin bandera, berde of bandera blauw, nan ta ricibi bo mes bon y si no tin bandera tambe”, el a bisa. Pa lider di MEP, e tipo di actitud aki ta mustra cu e hendenan kier scucha. Nan kier ta parti di e desaroyo cu tin den nos pais y nan kier ta parti di e cambio.
Otro aspecto importante di e campaña aki ta e ekipo di candidatonan cu el a traha cu ne. E ta cualifica e ekipo aki como uno sumamente bon prepara y cu un curason grandi pa sirbi nos comunidad. Un ekipo cu a dun’e espacio pa e por prepara e lista cu el a prepara, y cu a haci cu mas confiansa y siguridad pa nan por a presenta nan vision.
Cambio den politica
E ta spera cu MEP por a marca tambe cambio den politica na Aruba, cu bo por logra cos grandi sin mester di insulta bo oponente politico. Esaki independiente – segun e lider politico aki- cu nan a wordo “ataca y lastra”. E ta haya cu esaki ta parti aparentemente di e cultura politico, pero nan a prefera di no baha na e nivel ey, segun e.
El a motiva pa tur hende pa eherce nan derecho di voto diabierna awor, ya cu e ta bo oportunidad pa determina e rumbo di nos pais. E ta haya cu ainda tin hendenan indeciso pa kende nan ta bay vota. Of hendenan cu a dicidi di no bay vota loke ta aumenta e cifra di abstencion. Riba e grupo di persona aki e lider di MEP a haci un apelacion pa sali bay vota. “Tin hopi opcion, tin hopi alternativa, pero ta hopi importante pa bo sali bay vota”, el a declara.
E ta haya cu e voto ey ta decisivo pa cambia e rumbo politico di nos pais, pensando riba nos futuro generacion. Igualmente el a pidi na e grupo aki pa deposita nan confiansa riba partido MEP, ya cu segun e, nan tin e vision y ekipo pa bin cu e solucionnan necesario pa nos pais.
Otro candidato cu a reforsa e ponencia di nan lider di partido ta Setty Yarzagaray. Un punto cu Sra. Yarzagaray a trece dilanti ta e balor di nos hende y e sentimento di brinda ayudo, durante nan accion di colecta pa e daminificadonan di St. Maarten. Esaki ta un sentimento cu nan kier reenforsa mas. Pero tambe e por a sinti durante e campaña aki un ambiente di miedo cerca cierto hendenan. El a bisa cu como candidato di MEP, nan kier duna pueblo e confiansa y speransa bek.
Mientras cu e candidato nobo di MEP, Hendrik Tevreden a probecha e oportunidad di ceramento di nan campaña pa felicita nos pueblo y tur partido politico, faltando apenas tres dia pa bay eleccion. E felicitacion aki ta pa hiba un campaña di nivel a base di nan capacidad. Pero tambe pa bisa pueblo pa haci uzo di nan derecho di voto diabierna awor.
