Den un reciente entrevista cu Geomar Nadall, un activista di bida saludabel y ex- coach di bodybuilding, el a splica tocante cambionan cu persona por haci pa tin trankilidad, siña enfoca y tende locual bo curpa mester.

Nadal ta splica cu no ta locual e persona ta come so, sino tambe e manera di pensa, ta afecta e salud di un persona. “Si un persona come ‘junk’, e condicion fisico y mental tambe lo ta ‘junk’. Bo curpa ta manifesta esey. Pero si bo ta come saludabel, e mente tambe ta sinti asina.”

Pa un mente saludabel, e ta remarca cu ta importante pa un persona siña con pa ‘shut down’ tur e negativismo y pura cu tin den mundo. Tiki hende por enfoca. Nadall ta compronde por ta dificil mirando e situacion actual di bida, pero no mester lag’e afecta por completo. No mester preocupa constante, sino mester siña controla.

Nadall tambe ta promove un estilo di bida vegan. Por reemplasa lechi di baca cu coco of amandel. Awendia tambe tin keshi vegan, y hende ta uza bonchi pa reemplasa carni. Segun Nadall, e miho fuente di calcio ta vegetal, no baca ni lechi di otro bestia.

Nadall kier purba conscientisa comunidad pa nan yuda nan mes, pa ta mas consciente. Cu e cambio cu el a haci den su bida, e ta sinti mas hoben, compara cu personanan cu edad abou pero cu ya caba ta sinti cansa y bieu. E ta haci ehercicio pa elimina stress di su curpa, y asina tin un miho descanso.

Segun Nadall, mentalidad ta afecta e estado fisico di un persona, y di e mesun manera, alimentacion ta afecta mentalidad. E ta un ciclo, y den caso di Aruba, hende ta pega den un circulo no saludabel. En bes di come fruta y berdura tur dia, hende ta come pastechi cu malta mainta, algo cu mester haci den moderacion.

Nadall ta di opinion cu hende mester habri nan mente y siña stima nan mes. “Esey ta e conseho cu mi lo duna hende na Aruba: Haci investigacion di locual bo ta come. Mester busca ‘mindfulness’, esta un mente keto y trankil.”

Por busca trankilidad den naturalesa, cana den mondi ta trece esaki naturalmente. Bay beach, drenta den lama, tuma un poco solo. Nadall ta expresa cu e estilo di bida cu el a scoge ta pone cu e no ta bira malo ni mester bay dokter. E ta cura su mes cu productonan di te. Tambe e ta evita pensa di mas, of traha di mas, ‘purbando di laga e sistema un banda’.

Nadall ta un persona cu gusta haci ayuno (fasting). No tur hende por haci esaki, ya cu e ta un proceso cu ta rekeri hopi boluntad, y mester prepara bon. Nadall ta recomenda un persona cu di berdad kier bira saludabel por cuminsa cu stop di come carni. “E ta morto. Pakico mi lo kier morto den mi bida? Morto no por mantene bida.” Despues, reduci otro producto animal, manera galiña y pisca, y reemplasa esaki cu mas berdura y fruta.

Awendia den supermercado tin un gran variedad di producto vegan, revelando e interes moderno den e estilo di bida aki. Nadall ta bisa cu sistema actual ta pone nos paga caro pa nos salud. E ta comprende cu Aruba ta caro compara cu otro pais, pero si mira bon, tratamento pa cancer y otro remedi ta mas caro.

Nadall ta sugeri pa en bes di busca conveniencia, mester pone producto saludabel na bon prijs, asina lo evita gastonan medico, algo cu por trece cambio den comunidad. Esey ta e balor di bida. “Inverti placa den mi mes pa asina evita gastonan medico despues. Hende aki ta pensa AZV ta paga tur cos, pero nan no ta pensa cu e malesa por mata nan mas lihe, esey ta e wega.”

Nadall tambe a sugeri pa lesa y busca informacion tocante manera cu por trata cancer, pa asina e persona tuma un terapia di limpiesa y tratamento di un manera cu no ta afecta mesun hopi cu medicina awendia, cu ‘por mata mas lihe’.

Pa finalisa, Nadall ta conta cu su mes ta haci ‘flow movements’, cual ta nifica scucha su curpa pa sa ki movecion e tin cu haci. “Siña tende bo curpa. Mester purba ‘shutdown’ y enfoca riba bo mes, pa tin un bida relaha.”