No por bin cu un plan di Innovacion Integral pa Aruba si no percura pa mehora enseñansa na tur nivel. Asina dirigentenan di Instituto Pedagogico Arubano, IPA a bisa Bon Dia Aruba.
Manera ta conoci, Director General di IPA drs. Marilyn Richardson, Director di Profesionalisacion drs. Marisol Croes y Director Estudio Inicial Berthson Boekhoudt MSc a reuni cu Prome Minister Evelyn Wever Croes den su calidad di Formador riba e retonan y perspectivanan di enseñansa.
Ademas di ta Prome Minister y lo sigui cu e tarea aki, mr. Wever Croes tambe ta encarga cu innovacion na Aruba y ta sigui cu e responsabilidad aki den e siguiente Gobernacion. Y su guia ta e plan ‘Reposicionando nos Belanan’, cu ta e vision cu mester hiba Aruba na un nivel economico, social nobo basa riba sostenibilidad.
E pregunta ta si enseñansa tabata envolvi den traha e plan, mirando cu ta for di e sector mester sali esnan cu tin e capacidad pa educa hobennan cu berdad por bay maneha e belanan pa hiba e isla den un direccion desea.
“‘Reposicionando nos Belanan’ no a bay asina leu cu a pensa riba enseñansa. E plan ta sali di un strategia di recurso humano, cu poco hende ta compronde cu e ta rekeri e participacion di enseñansa,” drs. Marisol Croes, Director Profesionalisacion a bisa Bon Dia Aruba. “Berdad den e plan ta papia di traha a base di proyecto, pero nunca a puntra enseñansa kico mester remedia, prome cu yega na empoderamento di hubentud, pa por crea sectornan nobo.”
Drs. Croes a observa: “Si ta papia di e problema di conexion entre nivelnan di educacion y sector laboral, anto por conclui cu hasta cu e plan ‘Reposicionando nos Belanan’ ‘tin e mesun problema.’
