Diadomingo 26 di juli ultimo a tuma luga e prome concierto di Leerorkest Aruba titula ‘Cu henter mi alma’ via TeleAruba y medionan social.
Door di Covid no por a haci e concierto aki den un sala grandi cu tur mucha hunto y a nace e idea pa haci e gran concierto aki na un manera virtual cu tawata tin un exito total. Prome Minister Evelyn Wever-Croes tambe a duna su mensahe durante e concierto virtual enfatisando e importancia di musica den bida di e ser humano.
“Musica ta algo cu ta casi indispensabel den nos bida. Musica ta un medio di expresion universal cu tin hopi efecto positivo pa e ser humano. Poder di musica ta uni nos na un manera hopi special y den hopi ocasion e ta duna nos e empuhe pa duna e miho di nos mes. E ta un decision individual pa nos uni y haci esaki pa logra nos metanan. Ora nos haci esaki nos ta desplega nos habilidad pa traha hunto, scucha otro y asina crea un comunidad mas feliz.
E filosofia di Leerorkest ta ‘musica pa tur mucha’, no necesariamente tin cu bira musico, pero musica ta pa nan desaroyo positivo, pa evita cu nan por bay den mal caminda. Gobierno di Aruba ta hopi orguyoso di e proyecto hunto cu ayudo di Hulanda pa haci e proyecto aki realidad pa Aruba.
Na e momentonan aki ya tin scolnan basico participando y cu exito y ta forma nos muchanan den un ambiente musical y sano. Un virus nunca por kibra e tononan pa yega na muchanan feliz y exitoso. Musica ta uni nos mas den momentonan dificil y ta stimula nos creatividad pa sigui dilanti. Musica ta e herment ideal pa fomenta e habilidad unico di cada mente y curason hoben.
Leerorkest Aruba a trece hunto, musiconan di henter Reino pa ilustra e compromiso cu nos muchanan. E tawata un periodo di solitud cu un vision pa innova y comparti. E reto tawata “Cu henter mi alma”.
Mester agrega cu sigur cada desafio tin su banda bon, e aña aki pa motibo di e pandemia mundial, no por a presenta un concierto grandi manera tawata desea cu tur e muchanan hunto den un sala grandi. Sinembargo cu entusiasmo a sigui traha hunto riba un concierto virtual y presenta den un forma innovativo e logro di nos muchanan durante un corto tempo.
Mundo ta cambiando y Aruba tambe a tuma pasonan grandi y firme pa locual ta trata innovacion p.e. na scolnan, den nos diferente departamentonan y pronto nos Ministerraad tambe lo ta completamente digital y di e forma aki ta haci procesonan mas lihe y eficiente y no mester para mas den rijnan largo mas na departamentonan di Gobierno.
E aña aki Gobierno a decreta aña di innovacion y enseñansa y ta hopi a wordo haci riba e dos areanan aki y ta un muestra di cuanto avancenan riba e tereno di tecnologia danki na e innovacionnan aki cu awe nos por mira e concierto virtual ‘Cu henter mi alma’ di nos muchanan di Leerorkest.
Den nomber di Gobierno di Aruba mi kier gradici di curason un y tur cu ta traha cu dedicacion y amor pa yuda nos muchanan den e proyecto musical aki y desea tur nos muchanan hopi exito. Muchanan feliz ta crea difinitivamente un comunidad feliz!”.
