Diabierna mainta, Prome cu su biahe di trabao na Hulanda, pa atende reunionnan riba e tema di recuperacion di Aruba, Prome Minister Evelyn Wever-Croes a gradici henter comunidad pa e atencion pero principalmente pa e confiansa deposita den Gabinete Wever-Croes pa maneha e pais aki. Prome Minister durante conferencia di prensa di Gobierno di Aruba pa anuncia su biahe, meta di su biahe y e diferente reunionnan hunto cu Minister Xiomara Maduro, a laga e siguiente reflexion pa Aruba henter:
“Nos ta serando aña 2022, nos ta den e luna di Pasco y nos ta cerando un aña cu tabata hopi turbulente, un aña cu hopi tension, presion y nos no a logra pa tene tur cos trankil aki na Aruba debi na e presion cu nos tabata haya di Hulanda.
Pero 2023 ta bay ta un otro aña, mi no ta bisa cu e ta bay ta facil. Mundo henter ta preparando pa un 2023 cu lo tin mas inflacion, no tin un bista cu e guera di Rusia y UkraniaS ta bay finalisa. Hulanda ta preparando pa un recesion economico otro aña. A nos ainda ta premira crecemento economico. Nos ta mira cu e crecemento compara cu nos region y henter mundo ta mas grandi. Nos a ripara tambe cu e inflacion cu nos a sufri e aña aki ta halto pero mas abao cu esun di region y henter mundo. Kiermeen tin algo cu nos ta haciendo cu ta bayendo miho.
Y nos esfuerso ta bay ta otro aña pa e ta un bon aña. Un aña cu ta cuminsa trece progreso y bienestar pa tur ciudadano di pais. En todo caso den e area financiero tin mas trankilidad aworaki cu Hulanda cu lo permiti nos concentra riba desaroyo di nos pais. Nos tin un surplus pa prome biaha despues di e pandemia. Nos ta orguyoso di esaki pasobra ora bo tin surplus bo por inverti den scolnan, den cas di cuido, den salud, infrastructura, husticia, den e sistema social pa yuda esnan mas vulnerabel.
Un biaha mas danki pa e confiansa y cu Dios bendiciona cada ciudadano di nos pais”, Prome Minister Evelyn Wever-Croes a expresa.
