“Hunto cu esaki nos compromiso pa para uni cu Boso y lucha ainda mas fuerte pa transforma preocupacion, vision y ideanan nobo den un forza di cambio pa trece bek felicidad den hogarnan na Aruba”, un compromiso pa lucha pa cambio cu sigur ta resona den e situacion cu Aruba ta bibando, ta locual ta e line cora den e elequente mensahe di fin di aña di e lider di AVP, mr. Mike Eman.

Eman ta dirigi su mes na e comunidad cu un sentido di convivencia, responsabilidad y un spirito pensativo y ta acerca cada ciudadano cu e palabranan amigonan. Su mensahe ta cu sea cual sea e retonan nos dilanti, desilusionnan cu nos ta biba, inkietudnan cu nos ta trabesando, confianza y speranza nunca nos mag di perde. Nos Creador a proteha nos cu e forza di alma y curpa pa cambia locual no ta bon y no ta husto, pa libra nos di tur malo y provee oportunidad husto pa felicidad pa un y tur. Esey ta un Bendicion cu ta bin cu responsabilidad y compromiso na cual cada un di nos tin cu duna oido.

E lider di AVP ta mustra cu nos ta un Pueblo y Nacion cu den transcurso di historia a acepta e yamada aki cu hopi curashi y valentia. Desde inicio di bida riba nos isla chikito y vulnerable tabata biba y traha un poblacion cu a trabesa hamber y pobreza. Sin recursonan natural y sin medionan pa enfrenta e retonan mas basico pa subsistencia diario nan a traha, lucha y sacrifica pa sobrevivencia.

Eman ta bisa den su mensahe cu problemanan ta grandi, gigantesco y penoso. Pero nos por cambia e rumbo aki. Nos a yega di hacie na mas di un ocasion. Nos mester recobra e confianza den locual Aruba por. Pero e ta exigi liderazgo humilde, dedica na unicamente sirbi nos Pueblo cu alma, curason y celebro.

E ta enfatisa cu hustamente na e momentonan aki nos no ta desplegando e mihor calidadnan di capacidad, di vision y liderazgo pa atende cu e desafionan urgente y emergente cu ta menasa di hiba nos hopi aña atras, hopi aña atras den nos logronan constitucional, estatal y socio economico.

Pero e lider di AVP, mr. Mike Eman ta haci un yamada na Pueblo pa hunto bay realisa e cambio awor si: Laga wordo bisa di nos tambe cu a enfrenta e momento crucial aki cu nos a responde y a supera e retonan di nos tempo, a lucha y trece cambio cu nos pueblo merece. Nos mester ta e pioneronan pa un etapa nobo di rescate, recuperacion, progreso, di cambio, reformacion y renobacion.

Eman ta finalisa su mensahe cu un deseo di Bon Aña pa Aruba henter: den nomber di mi coleganan y su señora Doina, cu un curason yen di gratitud pa Boso apoyo y sosten den un tempo dificil pa nos y henter Aruba nos ta ora y mira na cielo cu e deseo cu nos Creador por Bendiciona henter Aruba; ilumina nos curason cu un speranza nobo pa hunto nos drenta un aña nobo cu Fe y amor pa trece felicidad bek riba nos isla y den nos hogarnan.

Un caluroso abrazo y hopi Bendicion. Bon Aña Aruba.