Aña 2019 tabata un aña cu tawata tin diferente reto cune pa famianan na Aruba, entre otro tambe un aña cu costo di bida a subi drasticamente, Aruba a conoce bastante medida ariba nos digno pueblo sin cu e tawata destina pa locual gobierno a bisa.
Hopi cabes di famia a perde trabou y otronan a experiencia caida drastico den benta. Aruba su sector di Turismo cu ta uno hopi vital y importante como nos pilar economico principal tambe conoce su retonan pa mantene como un destinacion di primera clase cu ta duna balor na innovacion, sostenibilidad y ta keda den liderazgo. Den aña 2020 Aruba como destinacion tin cu keda mas competitivo cu nunca y e exito di e esfuersonan tambe lo depende di decisionnan clave di parti di gobierno di Aruba pa fortalece Turismo. Nos pilar economico y su trahadonan cu ta sostene tin cu keda wordo aprecia y balora, no solamente cu reconocimento pero tambe den trato na pia di trabou, oportunidadnan pa crece, tempo valioso cu famia y pago husto.
Sin laga afo nos Enseñansa cu ta e fundeshi di un desaroyo di un pais na unda gobierno mester percura pa bin cu plannan concreto cu ta na beneficio di nos muchanan y hobennan y tur cu kier sigui studia pero sin falta respet na nos cuerpo di maestronan y docentenan cu ta contribui grandemente na e formacion di nos futuro generacion. Den e mundo di Enseñansa mester percura pa un linea cu un mensahe coherente y consecuente. Esunnan den Enseñansa mester tin trankilidad na trabou, siguridad y pago husto pa nan gran esfuersonan. Cada biaha cu corta den fondonan di Enseñansa ta cortando den e oportunidad pa progreso di nos comunidad di mañan. Alabes mi kier a comparti un mensahe na nos comunidad di Aruba, tur cu ta bibando riba nos isla, irrespectivo si bo a nace na Aruba of no, ban stima nos prohimo, respeta y stima nos grandinan y sea un bon ciudadano pa nos comunidad, saca un man pa yuda otro y keda leu di tur sorto di abuso, specialmente di alcohol y droga. Respeta nos muchanan y nos sernan femenino.
E aña 2019 mi sa cu pa hopi di nos conciudadanonan no tabata un aña facil, declarando cu 2020 lo ta uno hopi mas miho den tur aspecto.
Mi deseo ferviente ta pa nos habri un aña 2020 yena cu bendicion y felicidad di nos creador den nos hogarnan, den nos curason y ariba nos famianan. Cu 2020 trece pas, salud na abundancia y amor pa nos sigui lucha y contribui positivamente na nos dushi Aruba.
