Transparency International a publica nan index di corupcion
(AP) – Transparency International a publica su 2017 Corruption Perceptions Index unda nan ta mira cu mundialmente tin menos esfuerso di mayoria di paisnan pa combati corupcion.
Locual nan a cualifica como un desaroyo ‘peligroso’. “A pesar di e intencionnan pa combati corupcion den mundo, mayoria di e paisnan ta slow den nan intentonan”, e organisacion ta bisa. E ta tuma tempo sinembargo den e ultimo 6 aña no por mira mucho progreso den basta pais.”
Transparency International ta midi e desaroyo den 180 pais y teritorio e nivelnan di corupcion den sector publico. 0 ta nifica cu nan ta hopi corupto y riba number 100 e pais ta hopi limpi. Aña pasa New Zealand y Dinamarca tabata e paisnan cu menos corupcion midi. Aunke nan score a bay atras den 6 aña. E miho region tabata west Europa cu un score di 66 compara cu Africa sub Sahara cu un averahe di 32, sigui pa oost Europa y Asia central cu un score abou di 34.
E pais mas corupto ta Somalia (9) sigui pa zuid Sudan (12), Siria (14) y Afghanistan (15). Hulanda ta riba posicion 8 cu un score di 82. Mientras den e ultimo 5 aña Hulanda tabata score 83 y 84, pues nan a baha un tiki. No tin cifranan di e parti Caribense di Reino, pues nada di Aruba. Venezuela ta score 18 cual ta un mehoracion di 1 punto compara cu 2016. Pues tin hopi corupcion den e pais ainda, segun Transparency International.
E organisacion ta uza 13 fuente pa yega na e index, entre otro World Bank y World Economic Forum pa determina e nivelnan di soborno, uzo di fondo publico ilegal, uzo di funcion publico pa beneficio personal y otro asuntonan di corupcion. Locual e organisacion tambe ta midi ta e cantidad di periodistanan mata. Den e ultimo 6 aña por mira cu mayoria di periodista ta mata den paisnan cu ta score abou 45 riba e index (9 di cada 10 periodista mata). Y 1 di cada 5 periodista mata, tabata cubri un storia di corupcion.
Banda di esey e organisacion ta informa cu a base di data di World Justice Project, nan ta mira cu mayoria di e paisnan cu ta score abou riba libertad civil, tin un score halto pa corupcion. “Campañanan di difamacion, harassment, casonan legal y burocracia ta instrumentonan cu cierto gobiernonan ta uza contra esunnan cu ta pusha medida contra corupcion”, director operacional Patricia Moreira Transparency ta bisa.
