Gabinete Wever-Croes II ta bay conta cu siete of maximo ocho minister, segun formador, Evelyn Wever-Croes a duna di conoce. Segun prome minister Wever-Croes, e situacion actual ta duna motibo pa busca recorte presupuestario dentro di gobierno tambe.
Esaki segun un relato den portal online Aruba.nu.
E actual gabinete di e prome minister demisionario tabatin ocho minister riba e isla, y dos minister plenipotenciario na Den Haag y Washington. Cantidad di persona ta aspira pa e posicion di minister, pero segun Wever-Croes, no tin presion dentro di partido MEP pa pone e mayor cantidad di persona posibel riba posicionnan halto. “E personanan cu a base di nan posicion riba lista lo ta ‘na turno’, ta wardando cu pasenshi. Tampoco tin protocol dentro di nos partido cu ta prescribi ken ta bin na remarca pa un posicion specifico”, e portal online a cita Wever-Croes bisando.
Na e momento aki, ainda no tin un gobierno nobo. Segun Wever-Croes, e mester bin cu algo cerca Gobernador a mas tardar riba dia 8 di augustus proximo, pero ta durando pa e reparticion di e carteranan pa motibo di e screening riguroso di e posibel candidatonan pa bira minister den Gabinete Wever-Croes II. Pa e motibo aki, ya caba a cuminsa cu e screening aki, hasta prome cu a cera un acuerdo di gobernacion. Esaki lo mustra cu en todo caso algun minister actual por conta cu otro cuatro aña den servicio. For di fuentenan confiabel, e portal noticiero a ricibi informacion cu premier Wever-Croes mes; minister actual di Finanzas, Xiomara Maduro; y actual minister di Turismo, Deporte y Salubridad Publico, Dangui Oduber, ta e afortunadonan cu probablemente lo keda como minister den e proximo gobierno.
For di diaranson ultimo, formador Wever-Croes ta teniendo combersacionnan cu representantenan di organisacionnan importante y ‘stakeholders’.
