Menos Flambeu den parada pa motibo di seguridad

A surgi varios critica riba rednan social cu e parada di Flambeu e aña aki tabata tin mas luz artificial cu Flambeu. Pues pa algun hende den comunidad esaki no ta considera un parada di Flambeu mas. Segun Smac, pa mas cu un decada e parada di Flambeu a conoce cambio di tradicion aki na Aruba pa entre otro motibonan di seguridad.

Pa motibo di e holo cu esaki ta produci como tambe otro medidanan di seguridad, e uzo di Flambeu a bay atras den e ultimo decada na Aruba. “Nan no mester yama esaki parada di Flambeu mas. Djis yam’e parada di luz awo pasobra no tin ningun Flambeu!”, un cuidadano ta comenta riba radio. Segun presidente di Smac, sra. Shannon Henriquez, ora cu antes no tabata tin hopi luz, hende tabata keha cu no tin suficiente luz den e parada. Aworaki cu tin mas luz anto tin critica riba esey: “bo no sa cierto momento kico mas nan kier”,  e ta comenta. “E paradanan a bira hopi grandi pues nos intencion ta pa e bira algo bunita y pa wak bo hendenan inverti hopi tempo den loke ta nan t-shirt y otro materialnan,” sra. Henriquez ta bisa. Tabata tin Flambeu e aña aki pero pa solamente algun participante. Na dado momento despues di inica e parada nan no por a sigui cu nan pasobra esaki a cuminsa molestia nan. E Flambeunan cu nan a pone e aña aki a dura nan desde salida na Wendy’s Boulevard te ora cu nan a yega edificio di Juliana School. Despues di un rato e bailarinanan no por wanta e holo di e gas cu esaki ta produci.

Seguridad
Segun sra. Henriquez: “Ja, e ta facil pa critica pero ora cu bo ta un bailado cu un Flambeu den bo man, e no ta dje ‘gezellig’ ey tampoco. Nos mester corda cu e parada aki ta simbolico pa e inicio di Carnaval.” Cu e parada aki bo ta simbolicamente ‘cende e mecha’ pa start Caranaval anto normalmente e Flambeu ta wordo cendi den inicio di parada anto bo ta carga esaki te unda por yega cune. Pa proximo aña Smac kier wak pa cuminsa uza e luznan di candela falso. Gruponan ta hopi mas grandi awendia anto tin hopi mas material cu antes. E seguridad ta semper hopi importante segun Smac cu ta bisa: “E por ta hopi peligroso si bo ta sinta zwaai un candela pa hopi largo y esaki por ehempel pega den un peluca di un hende.”
Bon Dia Aruba a purba tuma contacto cu Brandweer pa un reaccion riba esaki y si tin algo cu a yega di pasa den pasado pero no a logra. Segun Smac, nan no sa si kico ta e metodo cu tabata wordo uza den pasado. En principio segun Smac,  a haya mayoria critica positivo en cuanto tabata parada di Flambeu anto tur cos a bay debidamente.