E cantidad di infeccion nobo di coronavirus registra na Hulanda a reduci cu casi mil den e 24 ora te cu dialuna mainta, segun cifranan nobo publica pa instituto di salubridad publico, RIVM.
Den total, RIVM a ricibi notificacion di 4,709 test positivo durante un dia, un reduccion di 987 compara cu cifra di diadomingo, cual tambe a reduci considerablemente.
A admiti mas hende den hospital – 177 total – y e cantidad di hende ricibiendo tratamento a aumenta cu 22 na 2,317. Di nan, 600 ta den unidad di cuido intensivo (ICU), dos mas cu diadomingo.
Cuarenta pashent mas a fayece. Durante ultimo shete dia (te cu dialuna), un averahe di 83 persona a fayece di coronavirus diariamente, compara cu 56 den e periodo un siman prome. Sinembargo, hopi biaha ta reporta morto varios dia of hasta siman despues di e suceso.
Mientras tanto, fuentenan na Den Haag a bisa NOS cu e gabinete probablemente no lo impone medidanan adicional awo, manera toque de queda, na Rotterdam, Dordrecht y Twente pa motibo di reduccion den e tasa di infeccion. Den tur tres region, e cantidad di infeccion nobo a reduci na mita, for di alrededor di 100 pa cada 100mil di e poblacion na fin di october, te na 50, y esey ta suficiente pa stop e menasa di medidanan adicional, e fuentenan a bisa.
Oficialnan di hunta di seguridad regional lo a reuni ayera nochi y awe ministernan lo discuti progreso prome cu tuma un decision final.
Diamars ultimo, gobierno a anuncia un periodo di dos siman cu medianan extra, incluyendo ciere di museo y parke di diversion, den un esfuerso pa duna empuhe na e reduccion den cantidad di caso. Na mita di october, tempo cu e cantidad di caso tabata alrededor di 10mil pa dia, gobierno a introduci loke a yama un ‘lockdown parcial’, cerando café y restaurantnan te mita di december, reduciendo tamaño di gruponan, y aumentando reglanan di higiena den tiendanan.
