Segun resumen di ayera di Departamento di Salubridad Publico DVG relaciona cu desaroyo di pandemia di Covid-19 na Aruba, ayera a registra 189 caso activo.
Esaki despues cu segun e resumen di DVG, ayera 53 persona a recupera di e malesa, mientras cu a registra un total di 15 caso nobo di Covid-19, di cual 4 no ta residente di Aruba.
E cantidad di fayecido no a conoce aumento y ta keda na 98.
E cantidad total di test di Covid-19 ehecuta ayera na e diferente localidadnan na Aruba, entre otro, laboratorio di hospital, laboratorionan priva y aeropuerto, ta 538 test. E tasa di positividad (‘positivity rate’) entre nos residentenan ta 12%.
Di su banda, hospital Dr. Horacio Oduber a informa cu tin un total di 26 persona interna pa ricibi tratamento pa e malesa causa pa e virus SARS-CoV-2. Di esakinan, 9 ta den Unidad di Cuido Intensivo (ICU) mientras 17 ta isola riba unidad general di covid.
