Na mas di un ocasion ariba rednan social como tambe den medionan di comunicacion por mira noticia cu cachonan riba caya ta ataca otro cachonan y hende. Un problema cu ta keda persisti mientras cu doñonan di mascota no ta tene nan mes na reglanan y ley di cacho.
Lamentablemente un otro caso di atake di cacho a sucede diadomingo atardi pa anochi den area di Oranjestad. Ta trata di un menor di edad cu a wordo ataca pa un cacho cu tabata riba caya.
E cacho aki ta un cacho cu tin doño, pero cu ta keda cana pafo di cura hunto cu otro cachonan. E cacho aki na mas di un ocasion a yega di tira pa morde riba otro personanan cu ta pasa canando den e caya unda e ta biba.
E biaha aki e cacho en cuestion a ataca e menor di edad, cu tambe ta biba den e mesun caya aki. E mucha a sali pa hunga pafo un rato y e cacho a acerc’e y a tira riba dje y a morde na su bil y su batata di pia.
Mayornan di e mucha mesora a yama polis cu a presenta na e sitio y a tuma e informacion necesario y mirando e severidad di e atake, a indica e mayornan pa hiba e mucha hospital di biaha.
Mayornan di e mucha a conta cu e cacho a morde e mucha fuerte y mester a cose algun di e heridanan pasobra nan tabata profundo y grandi.
Manera ta conoci, e ley di cacho, “Hondenverordening” ta existi desde 1988 den e registro central di ley di Aruba. Tambe ta conoci cu mayoria di e cachonan riba caya tin un doño, of nan tin un adres of un bario caminda nan por haya cuminda cual nan ta considera e ora como nan cas.
Tabata na 2012 cu e kehonan di cachonan riba caya, cu of sin doño, a yega na tal extremo cu a dicidi di renoba e ley existente; pa por atende cu doñonan cu no ta tene nan cachonan den cura. E ley di cacho revisa a bay na vigor dia prome di januari 2015.
Den e ley ta stipula cu e ciudadano cu ta doño of ‘houder’ di un cacho ta obliga y tin e responsabilidad pa tene su cacho den cura, of si no tin cura, na e reglanan stipula. Su autoridad ta dirigi riba decisionnan cu e por of mester tuma na bienestar di su mascota.
Te ainda tin doñonan di mascota cu no ta respeta e ley di cacho y ta laga nan cachonan cana riba caya cu consecuencia cu e cachonan ta ataca hende y otro cachonan.
