Cu e final di ciclo di reproduccion y cuminsamento di e di tres etapa di bida, hende muhe ta cuminsa su menopausa.
Tin mas of menos 34 sintoma relaciona cu menopausa cu hende muhe ta pasa den nan, mas of menos for di 45 pa 55 aña di edad, aunke ta varia den cada persona y tin hende muhe cu no ta experencia casi ningun di nan, pero tambe hende muhe cu ta experencia casi tur.
– Hot flashes: E ta sosode cerca hopi hende muhe. Esaki ta e sintoma mas comun, despues cu ta pasa ta keda un sensacion di calor, sensacion cu e sanger ta core for di e cara pa pecho, e cuero ta bira cayente y ta cuminsa soda.
– Depresion: Un tristesa cu no tin splicacion, baha di autoestima y no ta sinti confortabel ta sintomanan frecuente den hende muhe cu ta pasando den su menopausa. E splicacion pa cu esaki ta cu e nivel di estrogen den sanger ta baha. Aunke depresion pa su mes no ta un sintoma, tin factornan familiar y crisis personal cu ta duna chens pa e depresion aparece, y ora esaki ta sosode casi semper ta compaña pa desorden den comemento e persona ta sinti su mes ansha y descurasha.
– Sodamento anochi: Lantamento mita di anochi cu e paña papa soda kiermen cu bo ta hayando sodamento anochi. Hopi biaha esaki ta sosode pareu cu e hot flashes. Anochi algun hende muhe por sinti friu tanten cu nan curpa ta papa soda. E motibo ta cu e hende muhe ta pasando den cambio hormonal hopi fuerte.
– Cansancio mental: E persona ta sinti hopi cansa di pensa asina tanto tocante su menopausa y ta caba cu cansancio mental y un preocupacion constante cu no tin splicacion.
– Cansancio fisico: Perdemento di forsa y energia ta un causa pakico e actividadnan normal di un dia normal por causa un cansancio fisico asina grandi pa e hende muhe cu ta den su menopausa. E comemento malo y desbalansa di hormona ta yuda pa e cansancio fisico
– Cambio di humor: Ora e persona no por controla su emocion nan independiente di e situacion, ta wordo bisa cu e persona tin mood swing (cambio di humor) Emocionnan manera alegria, tristesa, rabia y miedo por trece e cambio di humor cual por sosode durante e dia normalmente den trabao of na cas.
– Anshamento: Sentimento di repenti di panico y algun problema familiar pa chikito cu por ta, por hiba e hende muhe na sinti anshamento pisa.
– Gana di grawata e cuero y sentimento cu tin fruminga ta cana bao di e cuero mas tanto den e man y pianan
– Vagina seco: Secura den vagina ta laga sinti e persona hopi incomodo durante e acto sexual. Pa motibo cu no ta un sintoma cu ta wordo discuti di manera abierto cu e dokter e muhe ta sinti hopi incomodo y ta un causa pa sinti depresivo.
– Perdida di apetit sexual ta hopi comun den hende muhe cu ta pasa den su menopausa pa perdemento di interes sexual sosode.
– Caymento di cabey: E cabey ta cay y e ta bira delega y ta kibra facil, esaki ta hiba na un situacion di stress y depresion
– Retencion di likido: E muhe ta sinti hincha pa retencion di likido pa lo cual ta sinti un sensacion cu ta gordo pero ta likido ta wanta den su curpa
– Incontinencia, esta e persona por pishi su paña hopi facil, dolor di cabes di repenti, dolor di pecho, rabiamento, ganamento di peso, perdemento di soño, problemanan di memoria, draaimento di cabes, indigestion y sensacion di yena, infeccion vaginal mas frecuente, batimento di curason hopi lihe, problemanan cu blaas, aumento di alergia, holo di curpa mas fuerte, dolornan muscular, kibramento di huña ta entre otro e sintomanan cu un hende muhe cu ta pasando den su menopausa por experencia.
Nos mester para un rato y pensa cuanto cos un hende muhe cu ta pasando den menopausa por experencia y nos mester compronde di otro banda cu no ta un periodo facil pa nan. Ta berdad cu pa suerte di algun muhe su menopausa ta yega bay sin cu nan ta sinti nada of solamente un of dos di tur e sintomanan aki. Sinembargo mayoria di hende muhe ta experencia hopi di esaki y no ta facil ni pa su famia corda pa nan mes cu ta pasa dia a den dia afo pa motibo di tur esaki. Hasta ainda e topico aki no ta uno papia facil over di dje.
