(NLTimes) – Periodistanan na Hulanda cada bes mas ta enfrentando menasa di accion legal – hende ta menasa di demanda nan pa un publicacion. Y esaki ta conduciendo na auto-censura, problema psicologico y presion financiero, specialmente pa periodista freelance y medionan chikito, segun Free Press Unlimited (FPU) a haya den un encuesta di mas di 50 periodista, hefe di redaccion, abogado y otro partidonan.
“Ademas di intimidacion y agresion online, periodismo independiente na Hulanda ta bin bao cada bes mas presion di e menasa di accion legal,” director general di FPU, Ruth Kronenburg a bisa. “Si periodistanan cuminsa aplica auto-censura bao presion di accion legal, esaki ta preocupante no solamente pa nos medionan di comunicacion pero specialmente pa nos democracia.”
Segun FPU, periodistanan ta enfrenta tres tipo di presion di accion legal contra nan – e impacto financiero di e proceduranan, e tempo inverti den prepara pa e proceduranan, y consecuencianan psicologico, specialmente den caso unda ta ataca nan publicamente. “E efectonan aki hopi biaha indirectamente ta impulsa auto-censura,” FPU a bisa. “Periodistanan ta haci nan storianan mas zwak, ta omiti informacion verifica, of no ta sigui cu investigacion pa evita conflicto legal.” Hopi periodista ta indica cu e menasa di accion legal ta causa stress severo, ansiedad y peso psicologico – algo cu hopi biaha nan editornan ta subestima, FPU a bisa.
Periodistanan freelance y esnan trahando pa medionan mas chikito ta sufri mas bao e presion aki, e estudio a mustra. “E grupo aki ta esun mas vulnerable pa e efectonan posible y pues tin mas probabilidad di usa auto-censura.” Pero periodista pa publicacionnan mayor tambe ta experimenta varios preocupacion silencioso tocante con pa paga gastonan legal, a pesar di e proteccion ofreci pa traha pa un titulo mayor.
Segun FPU, e presion legal mas grandi riba periodista ta bin di e Demanda Strategico Contra Participacion Publico (SLAPP). “E demandanan aki hopi biaha ta bin di individuonan afluente y poderoso contra periodista, defensor di derechonan humano y organisacionnan di sociedad civil cu meta pa intimida, presiona y silencia nan.”
FPU a bisa cu ley actual na Hulanda ta duna opcion contra abuso di ley procedural, pero no ta ofrece proteccion practico contra casonan SLAPP. Conseho Europeo ta bay firma un directiva hopi anticipa pa protege periodista y defensornan di derechonan humano contra SLAPP e siman aki, y FPU a urgi Hulanda pa agrega esaki rapidamente na ley Hulandes.
