Memey di situacion actual di emergencia: Minister Glenbert Croes ta lamenta investigacion rond maneho di FASE

Tin kehonan di hendenan te hasta investigacion riba maneho di FASE (Fondo di Asistencia Social di Emergencia). Ainda tin hende cu ta keha cu nan no a wordo beneficia cu e fondo di ayudo social aki destina pa tur esnan cu a perde nan trabao.

Ta asina cu segun cifra oficial un grupo di 1851 persona cu a aplica pa FASE, no a cumpli cu tur rekisito exigi pa ricibi e ayudo social aki. Tambe tin un grupo di 1932 cu ta confronta problema pa tin acceso na FASE debi cu nan a haci dobel aplicacion. Segun minister di Asunto Social y Labor, Glenbert Croes tur e casonan aki ta wordo reevalua y atendi corectamente. E hendenan aki, cu ta alrededor di 3 mil, lo wordo yama pa nan por cumpli ya cu e fondo aki ta destina pa yuda e ciudadano, segun e mandatario.

Croes a informa cu e team di FASE ta den evaluacion continuo. Pero no te ainda e no por a sigura na Bon Dia Aruba un fecha cu tur e evaluacion aki lo bin cla. El a indica cu e trabao aki ta uno inmenso caminda nan mester uni esfuerso cu diferente departamento y instancia. E siman aki cumpliendo cu e di dos transaccion di pago di FASE nan tin alrededor di 10 mil hende cu lo ricibi un ayudo di FASE.

Segun e mandatario, tin hendenan cu ta pone baranca den nan caminda pa impedi cu nan por cumpli cu FASE. Ya cu tin un investigacion andando rond di henter e situacion di FASE. E ta haya cu e no ta esun cu nan ta purba di afecta politicamente, pero e ciudadano ta esun mas perhudica of e comerciante independiente den henter e situacion di emergencia humano aki.

Tin caso cu no a wordo resolvi ainda riba otorgamento di FASE. Croes a trece e siguiente reflexion: tin cos cu e por y otronan cu e no por. E no por aproba cu e placa ta wordo duna sin cumpli cu e rekisitonan, el a bisa claramente. Den cuadro di cumplimento di gobernacion, caminda nan ta administra placa di otro hendenan, nan mester ta responsabel. “E no ta mi placa, e ta placa di nos tur.”

El a splica cu tin reglanan den e procedemento di FASE cu nan mester wordo atendi na dje pa cumpli cune. Entre nan cu ley di contabilidad cu hasta den momentonan di emergencia y calamidad cu nos ta pasando aden, gobernacion tin cu cumpli. Y a pesar di esey –segun e minister – nan ta atendiendo e regla di FASE cu hopi flexibilidad.

Linea cora

E ta haya cu si FASE ta un fondo di emergencia cu no ta duna asistencia na emergencia, bo ta lagando un gran cantidad di hende pasa necesidad. E mandatario a reitera cu esey no ta e proposito ni intencion di gobierno. Tin hende cu tin minister su number di telefon y nan ta mand’e nan registro di FASE via WhatsApp. E ta percura pa manda nan pa e team di FASE pa wordo atendi segun e reglanan estableci. Pero tin un linea cora, entre nan: nan mester ta legalmente na Aruba, nacionalidad Hulandes, yiu di tera y/of firma liber. E mandatario a bisa cu e ciudadano mester cumpli pa asina FASE por cumpli cu e pago.

E mandatario a bisa cu no ta existi un lista negativo. Tur hende lo keda den evaluacion. Igualmente el a reacciona cu su ministerio ta respondiendo na e clamor di e hendenan cu kier bin na FASE. El a tene un reunion cu e sindicatonan y tambe e grupo Ciudadanonan Preocupa lidera pa Rodrigo Tromp hunto cu SEPPA, pa mira con nan por asisti gobierno pa atende cu e problemanan cu nan ta confronta actualmente. El a bisa cu a base di e inkietud nan cu nan ta trece dilanti, nan ta buscando metodo nobo di solucion.

Un problema a bira e falta di comunicacion. P’esey el a anuncia un call center nobo y reforsa. No solamente pa e hendenan cu ta keha cu nan no ta haya contesta riba nan aplicacion y ayudo. Sino cu tambe nan ta wordo yama sin haya contesta for di e ciudadano pa asina brinda e ayudo solicita.