Ya no ta secreto mas pa pueblo di Aruba, cu e pais ta wordo dirigi pa un Prome Minister kende tin problema pa papia berdad, cu tin problema grandi pa ta sincero cu su pueblo y cu e ta exigi pueblo pa haci algo, pa despues e mes bira haci esaki.

Melvin Tromp di partido AVP a mustra cu pa tres aña caba Prome Minister Evelyn Wever Croes simplemente no ta respeta pueblo di Aruba suficientemente, pa e papia e berdad cu u n pueblo caminda su difunto omo Betico Cvroes, a yega di bisa cu ‘Vox Populi, Vox Dei’, bos di pueblo ta bos di Dios.

“Tanto Prome Minister a bin ta papia di integridad, di transparencia pero simplemente no ta pasa ningun siman bay, cu Evelyn ta wordo gara di no ta papia berdad.

Ya for di 2017 caba el a gaña pueblo cu e lo goberna sin tuma medida pero historia ta mustra cu no tin ningun otro Prome Minister di Aruba, kende a introduci asina hopi medida maenra Evelyn.

BBO y cantidad di otro nomber mas pa ranca placa for di pueblo, ranca placa for di comercio pa hiba un maneho dirigi pa su famia y amigonan, caminda CFT tin varios aña caba mustrando cu costo di gasto di personal, a subi bou gobernacion di Evelyn Wever Croes, cu mas di 100 miyon florin.

Den ultimo dianan Evelyn no solamente a mustra di no ta sincero cu pueblo pero hasta cu su propio miembronan di gobierno, el a mustra un falsedad sin precedente, caminda diahuebs ultimo personalmente, el a logra di retira Marisol Lopez Tromp como miembro di su gobierno.

E crimen cu Marisol a comete den bista di Evelyn, tabata di tribi di denuncia corupcion, denuncia fraude y cantidad di otro bagamunderianan cu a bin ta trumanhdo luga den Evelyn su gobierno.

Tur esaki usando tacticanan di mentira, entre otro insistiendo cu e kier reuni cu Marisol den bista di pueblo, mientras cu ya caba el a tuma e decision di manda un carta pa gobernador pa informa cu su Conseho di Minister, no por traha cu Marisol mas y cu e no por keda como miembro di su gobierno

Pa di dos biaha den historia, un lider di partido MEP ta duna Marisol su retiro, sea como miembro di e partido y awor como miembro di un gobierno di MEP, caminda ta keda confirma cu simplemente Marisol mester a tapa woro pa bagamunderianan cu a bin ta tumando luga den gobierno di Evelyn y haci su mes culpabel na complicidad di mal uso di placa di pueblo.

Marisol kende no a cumpli ni un aña como Minister, mester a bay ya cu e prome intento di Evelyn pa dialoga despues di e famoso reunion di Parlamento dia 31 di Juli ultimo, pa convence Marisol pa laga tur e cosnan malo un banda y sigui coopera den e bagamunderianan aki, no a cristalisa.

Aki pueblo por ripara c’un biaha mas sinceridad, integridad y tur loke cu mester ta parti di bon gobernacion, simplemente no ta conta pa Prome Minister Evelyn Wever Croes, kende por cierto awor ta atende cu e cartera di ex Minister Marisol te ora cu un otro Minister wordo nombra.

Awo mas cu nunca pueblo mester pone bista riba kico Marisol of e proximo Minister lo haci, esta di sigui cu e proceso di denuncia corupcion, sigui cu e proceso pa exigi su Ministernan cu a cometa actonan incorecto retira of e lo dicidi di sconde tur cos, conta un storia manera un fabula y kere cu henter pueblo lo lubida esakinan.

E ansha pa poder, e ansha pa ta na cabes di un gobierno manipulado, un gobierno cu ta goberna pa amigo-, famia- y sponsornan, ta mas grandi cu mustra pueblo cu su gobierno tin integridad y esunnan cu a comete actonan ilegal, a tuma decisionnan contra interes di pueblo, tin cu wordo persigui.

Evelyn lo mustra pueblo un biaha mas cu e no por ta sincero cu pueblo y cu tur e denuncianan cu Marisol a haci anuncio cu ta existi, lo no mira luz di dia ya cu e lo stroba cantidad di negoshi di famia y amigonan y ta algo cu Evelyn ni MEP por permiti,” Melvin Tromp di AVP a declara.