Aruba tin un Prome Minister cu tin cuater aña papiando bunita cu pueblo pero su accionnan ta simplemente hopi mahos ora cu ta toca asuntonan di interes general pa pueblo.
Gabinete Wever Croes a cambia dos Minister caba den menos di tres aña caminda e lider di POR, Otmar Oduber, a dicidi di bandona politica pa bay traha den negoshi di su famia y di su mes, mustrando cu ta su famia ta bin prome na turno mientras cu pueblo tin cu mira con e ta sobrebibi.
Ta bay haci un aña dentro di algun siman cu e ex Minister Otmar Oduber a bandona gobierno pero e ta sigui di ta mustra manera el a bisa despues di resultado di eleccion 2017, cu su partido cu dos asiento, ta e yabi di gobierno.
Wel den fin di siman Otmar Oduber a bolbe mustra su poder riba Prome Minister y su gobierno, organisando un actividad den e Parke Bochincha, percurando pa un aglomeracion di hende den un tempo di pandemia, caminda Prome Minister practicamente tur dia ta ordena y pidi pueblo pa cuida.
Parke di Bochincha a bira un centro di actividad, di bebemento y di baile, cantidad di hende riba otro pero caminda Prome Minister y su gobierno a confirma, cu tur loke nan haci ta bon y loke pueblo ta purba di haci no ta wordo permiti.
Representante di DVG ta participa na medionan di comunicacion cu creyentenan cu ta bishita Misa di Aurora pa celebra nacemento di Jesus, mester wak e misa aki via transmision di television of riba rednan social, ya cu e pandemia ta sigui existente y no ta responsabel pa hopi hende sinta den misa y canta hunto.
Pero na Parke di Bochincha gobierno y den e caso aki DVG tambe, a mustra cu e regla aki no ta conta pa e homber mas influyente den gabinete Wever Croes, esta Otmar kende ta haci loke cu e kier, con cu e kier y cu ningun instancia tin algo pa bise.
Polisnan a bay na e parke, a controla paden, bin pafo y bisa cu ta cumpliendo cu reglanan stipula pa DVG den nomber di gobierno, di tene distancia y otro reglanan pero por a mira riba cantidad di publicacion cu esaki no tabata e caso.
E torneo di futbol di AVB organisa den memoria di Gilbert Betico Croes, mester wordo hunga sin fanatico y aki tin cu corda cu ta trata aki di e fundado di MEP, e Libertador di Aruba, pero tanto DVG como Prome Minister, a confirma den fin di siman cu Otmar Oduber ta mas grandi cu Betico Croes y e si por a yena su parke di container cu cuanto hende cu e tabata kier.
Na varios luga publico, bar y restaurantnan, polisnan ta yega bati na porta y grita duro cu tur hende sinta paden, tin cu bandona e luga pa motibo cu no ta permiti aglomeracion di hendenan cu ta totalisa entre 10 pa 15 persona.
Na Parke Bochincha tabata mas cu 100 persona den e luga si no ta mas pero pa esey si e reglanan di DVG no ta conta y ta duna excepcion na e ex Minister y supuesto ex politico, ya cu su partido cu el a funda, ta yabi di e gobierno.
Famianan cu ta biba hunto den un cas, ta bay pasa un dia den solo na beachnan rond Aruba, pero dado momento polisnan ta yega y ordena tur hende pa piki nan cosnan y bay cas bek ya cu no ta permiti aglomeracion di hende na luganan publico.
Asina por menciona cantidad di otro accionnan cu a wordo tuma contra pueblo pa asina percura cu por evita cu e pandemia di corona virus ta plama atrobe pero pa ex Minister y partner ainda di gobierno, ta permiti Otmar Oduber un status diferente, un status di previlegio, hasta por bisa e status di intocabel.
Prome Minister ta sigui demostra cu e no ta sincero cu pueblo, cu e no ta husto sigur ora cu e bay radio pidi tur hende cu biaha pa exterior, pa nan mes tuma e iniciativa y pone nan mes den un cuarentena di dies dia pa ta sigur cu nan no ta importa y plama e virus aki den comunidad.
Pero Evelyn Wever Croes ta bay Florida cu su famia ta bin bek y dos dia despues ta den Parlamento ta atacando lider di AVP, Mike Eman mientras cu e miembronan di famia cu a bay cu vacacion den exterior, ta cana liber rond.
Pero otronan tin cu haci esfuerso, no su gobierno, no su persona y sigur tampoco Otmar Oduber ya cu de lo contrario gabinete Wever Croes los top di existi.
