Hende cu ta biba den cas di glas, no mester hunga cu piedra, ta un dicho masha popular pero pa Prome Minister Evelyn Wever Croes, ta parce cu nunca el a tende di e dicho aki. Melvin Tromp di partido AVP ta mustra cu e esfuerso di Prome Minister Evelyn Wever Croes pa trata di sconde e berdad financiero di su gobierno, sconde e paketenan di medida cu ta na caminda den proximo lunanan, simplemente no por traha.

Ni maske cu e trata di atacha integridad di un politico hoben y capacidad manera Richard Arends, kende ta mustra mucho mas madurez politico compara cu e lider di MEP.

“Ora cu pueblo scucha Evelyn insinua cosnan den reunion di parlamento anto despues pretende cu ta Richard Arends mester bin cu prueba cu esaki no ta berdad, ta confirma cu simplemente e no tin nada di papia ariba y cu e ta sconde tres di e berdad cruel di otro pakete di medida cu ta na caminda.

Hende grandi tin cu keda grandi pero ora un Prome Minister di un pais bin den un reunion caminda e mester a papia riba ehecucion di presupuesto 2019 di su gobierno, ta mas cu claro cu e tin cos di sconde for di pueblo, dor di inventa cosnan cu no ta existi y cu no ta berdad.

No solamente el a lansa pruebanan sin base y cu no ta cuadra cu berdad, Prome Minister a haya algun hende den e coro di gobierno den Parlamento, pa bati man y hunga drama y tur dispuesto pa sinta den un reunion y wordo uza pa nan Prome Minister di e forma aki.

Ningun miembro di e fraccion y tampoco Presidente di Parlamento a para Prome Minister den su weganan baho aki y hala su atencion cu e mester atende su maneho financiero di e prome dos kwartaalnan.

Cu sosten di un grupo di payasonan den parlamento, cu no conoce ni reglanan mara na nan funcion como miembro di e conseho legislativo di Aruba, boluntariamente a permiti nan mes wordo ridiculisa di e forma con Evelyn a haci un drama riba un asunto cu no ta existi y cu nunca a existi.

Sinembargo den su esfuerso pa ridiculisa un miembro di oposicion, Prome Minister a perde respet na tur instancia cu mester a controla tur miembro di Parlamento ora cu nan a huramenta, esta cu nan no tin ningun otro trabou eherciendo.

Na papiamento tin otro dicho tambe cu mi por uza na e momentonan aki pa Prome Minister, esta cu esun cu scupi den halto, esaki ta cay den su cara.

Haciendo tanto babel pa nada, insinuando cosnan cu no ta berdad y cu sigur nunca a existi, Evelyn por a haci uzo di e tempo aki pa aclaria na parlamento, con su famianan cercano, den ocho aña di gobierno di MEP, a logra di strica un suma di 25 miyon florin, na huurmento di edificio, na uzo di oficina di abogado di su papa y otro contractonan cu famianan a ricibi.

Tur e placa aki tambe ta pueblo a paga caminda un famia hopi cerca di dje, a construi un edificio y durante di construccion su omo a firma un contracto pa huur e edificio aki.

Ora Evelyn kier papia di integridad y bin dilanti y splica pueblo con su famia ta e famia cu mas a wordo beneficia durante di gobernacionnan di MEP y awor atrobe bou di gobernacion di su persona.

Haci boroto cu algo sin sentido simplemente pa sconde e hecho cu un biaha mas lo Sali na cla cu Gabinete Wever Croes su gastonan di personal a bolbe subi y caminda entre otro a sigui tuma hende den servicio.

Prome Minister tin hopi cos pa splica pueblo prome cu e mishi cu integridad di hendenan recto y serio, sigur ora cu haci tur e cosnan aki pa pueblo no paga duna atencion cu otro serie di medida ta na caminda,” Melvin Tromp di AVP a declara.