Ta casi tres aña pasa cu Prome Minister Evelyn Wever Croes a dirigi su mes na pueblo di Aruba despues di a huramenta, caminda el a sigura pueblo cu tur cos lo bira miho, cu su gobierno lo tin solucion pa un miho futuro.

Melvin Tromp di partido AVP ta mustra cu Evelyn Wever Croes y hetner su gabinete  a sigura pueblo cu nan tin solucion pa tur problema, cu nan lo soluciona e situacion financiero sin tuma medida.

“Awe nos ta algun ora aleha for di un momento historico, un momento cu hasta su omo Betico Croes den felis memoria, a pensa ni un rato cu esaki lo sosode, esta cu su propio sobrina, lo entrega autonomia di nos pais bek na Hulanda.

Un acto cu ta destrui henter e historia grandi di Betico y otro lidernan di pasado manera Shon Henny Eman, Shon A Eman y otronan cu a lucha asina hopi pa logra e autonomia aki.

Awe pa un maneho desastroso, un maneho sin pia ni cabes, un vision sin vision combina c’un incapacidad hamas bisto den historia politico di nos pais, Prome Minister Evelyn Wever Croes lo entrega autonomia di nos pais bek na Hulanda.

Evelyn a priminti un operador nobo pa refineria ya cu e tabatin cantidad para den rij pa habri e refineria pero tur loke su persona y su gobierno a haci, ta di dal e refineria cera y laga e operador Citgo bayu liber di paga miyones di florin pa incumplimento.

El a priminti reduccion di prijs di awa y coriente pero nunca a logra y a priminti di busca gas for di Colombia pero nunca a cumpli.

Gasolin lo a bira mas barata pero tampoco a ser logra, educacion lo a bira miho pero awe  enseñansa  ta pasando den su pio momento mientras cu lo elimina criminalidad mas tanto cu por pero awe pueblo ta bou constante peliger na man di criminalnan.

Scuchando Prome Minister Evelyn Wever Croes papia di covid-19 como e mayor problema cu Hulanda, ta otro muestra di su incapacidad y sigur insinceridad ya cu ta for di 2018 Evelyn cu Xiomara Ruiz Maduro a firma e protocol pa Hulanda bin haci y deshaci aki na Aruba.

Ta un berguensa di marca mayor loke lo pasa diabierna awor ora cu Evelyn duna Hulanda autorisacion pa bin aki y tuma practicamente tur cos over, pa nan bin haci loke cu nan kier y retira mas tanto hende cu nan por for di e aparato publico.

Loke Evelyn Wever Croes ta logra diabierna aki ta di crucifica hopi trahado, pa cumpli cu loke el a priminti Hulanda di lo haci pero nunca  a haci mientras cu ainda si tur su famianan cu el a tuma den servicio, ta sigui na pia di trabou, ta sigui dilanti sin kibra nan cabes.

Na vispera di cumpli tres aña den gobernacion,  Evelyn Wever Croes kende a bira e prome Prome Minister femenino den historia di nos pais, tambe lo bira e Prome Minister cu a duna autonomia di su pueblo bek na Hulanda y tur esaki pa motibo cu e no tabatin solucion pa ningun problema di e pais.

Tres aña den gobernacion sin duna pueblo ningun beneficio, sin duna pueblo ningun progreso pero solamente a suta pueblo cu medida y mas medida, mientras cu ainda tin mas medida pa wordo impone riba nos pueblo ora cu Hulanda tuma over na nomber di Evelyn Wever Croes.

Su famia a bira rico cu gobernacion di nos pais  caminda Evelyn Wever Croes mes lo no tin ningun tipo di problema financiero pero si a logra di hinca miles di tata y mama di famia den un situacion precario financieramente.

Historia politico lo wordo scirbi diabierna pa Evelyn Wever Croes y su gobierno y e unico proyecto cu e ta laga den ehecucion ainda, ta investigacion di corupcion di su ex Minister di Infrastructura caminda hasta den oficina di su gobierno na Cocolishi, autoridadnan a  drenta pa busca mas prueba di corupcion.

Evelyn Wever Croes lo entrega un pais sin autonomia bek na pueblo, un pais den problema financiero grandi, cu problemanan social y economico nunca bisto, tur resultado di un maneho sin pia ni cabes, un maneho di gobernantenan totalmente incapacita,” Melvin Tromp di AVP a declara.