Lekmento di lista di pashentnan cu a test positivo pa covid-19, a causa un impacto den comunidad ya cu viola un regla sagrado den mundo di cuido medico, cu ta e secreto di cada pashent cu wordo trata. Melvin Tromp di partido AVP a mustra cu den un forma di cobarde, Minister di Salubridad Publico, Dangui Oduber, publicamente a trata di acusa partido AVP di a saca e lista aki, sabiendo cu bou di ningun circanstancia, partido AVP lo por tabatin acceso na algun asina delicado.

“Minister Dangui Oduber no tabata serio y ainda e no ta serio, lansando acusacionnan asina den direccion di partido AVP, mientras cu e probabilidad mas grandi for di comiensa, tabata sinta for di den su propio seno.Riba hopi red social a menciona varios nomber, te for di famia di Prome Minister y Minister Dangui mes, te na funcionarionan trahando den seno di gobierno actual.

Fuera di Dangui bo ta bin haya e lider di fraccion di MEP den Parlamento, Rocco Tjong, kende tambe a dicidi di lansa acusacion incorecto y falso den direccion di AVP pero aki mi ta kere ta pa motibonan mas tanto di envidia politico.

Segun Rocco Tjon ta den e cumbra medico cu partido AVP a organisa pa duna pueblo informacion mas amplio, e lista lo a lek caminda el a insinua cu ta un di e profesionalnan cu tabata orado den e cumbre aki, a lek e lista den pueblo.

Aki por mira un biaha mas cu e lider di fraccion di MEP ta trata di kita for di e balor y importancia di e cumbre cu partido AVP a organisa, mientras cu su partido y pa colmo su gobierno, no a mira e balor di informa pueblo den un forma mucho mas amplio y efectivo, cu no ta un campaَña promocional di su lider y Prome Minister.

Pa loke ta Minister Dangui Oduber, e situacion tabata asina mas pio, ya cu simplemente e no tabatin e capacidad, loke ya caba tur hende ta na altura di esey, pa a dirigi henter e maneho d covid-19 den e forma cu su responsabilidad como Minister di Salud Publico mester a haci.

Dangui tabatin necesidad di e ayudo di un persona cu mas amplio educacion manera Prome Minister Evelyn Wever Croes, kende por cierto tampoco tin conocemento medico, pa asina cubri e materia cu su persona ta responabel pa carga.

Leu leu Dangui por a papia algo, por a bin dilanti y bisa algo pero nada concreto y den e caso di lekmento di e lista di pashentnan cu a test positivo, awor tur cos a bin cay den su scochi.

Awo ta bin sali na cla cu ta un trahado den e oficina di Minister Dangui lo a lek e lista aki na tercera partido cu na su turno a lek esaki pa mas hende, mustrando un biaha mas e falta di karacter di e Minister ora cu e asunto akia bira conoci.

E falta di seriedad aki ta otro muestra di su incapacidad, caminda simplemente na luga di duna reconocimento pa loke AVP a haci cu e anochi di informacion pa comunidad den e cumbre organisa, el a prefera di purba di bagatalisa esaki acusando AVP di ta lek e lista den publidad.

Te ainda nos no a scucha cu Minister Dangui Oduber a schors su trahado of cu el a mand’e cas pa mas investigacion y tampoco nos por a tuma nota di un disculpa general di Minister Oduber na tur esunnan perhudica den e fayo grandi aki si en berdad ta su propio trahado a haci esaki.

Tampoco Minister Dangui a bay Minister Publico pa un investigacion legal caminda por habri caminda pa esunnan perhudica, bay over na exigi daño y perhuicio pa tur e incomodidad cu nan a haya nan mes ta confrontando,” Melvin Tromp di AVP a declara.