Melvin Tromp (AVP): MEP celebrando  aniversario cu anuncio di Minister Presidente cu  COHO a yega

Den un comunicado di prensa emiti pa e lider di partido MEP, Evelyn Wever Croes, el a recorda e hecho cu dia 14 di februari ultimo,  su partido a recorda e hecho cu oficialmente a wordo funda pa fundador Betico Croes den felis memoria.

Melvin Tromp di partido AVP ta mustra den un comunicado di prensa, cu na e ocasion aki casi riba mesun fecha aki cu MEP a wordo funda, e lider actual di MEP un siman prome dia 7 di februari ultimo, ta informa cu tanto su gobierno den nomber di Aruba, hunto cu Corsou y Sint Maarten a yega na un acuerdo pa introduci e ley cu ta oficialisa COHO.

Pues aki historio a wordo skirbi atrobe  pa partido MEP caminda por tuma nota con Evelyn Wever Croes lider actual a elogia e lucha di Betico Croes den felis memoria, mustrando cu ‘Betico tabata sa di uni nos pueblo den un ideal y e ideal tabata pa nos mes por tuma nos propio decisionnan.’

Wel awor celebrando 51 aña di existencia Prome Minister y lider di MEP ta bin dilanti y anuncia cu tin areglo cu COHO, caminda practicamente e rol di Parlamento ta wordo reduci na un minimo, tur asunto financiero ta bay segun  e Hulandesnan di COHO lo mira esaki.

Na mes momento a wordo anuncia cu COHO lo tin di bisa den husticia di nos pais, den enseñansa  tambe y caminda practicamente loke Betico y otro lidernan grandi a lucha pa Aruba ta baas den su cas, a wordo pasa awor pa COHO di Hulanda.

Tambe por a tuma nota cu e lider actual di MEP a dicidi di menciona logronan di su partido durante di su 51 aña di existencia, caminda e tabatin elogio pa ex Lider Nelson Oduber, kende segun Evelyn, a hiba un maneho pa drecha e pais a base di un gobernacion e principio di bon gobernacion.

Aki e lider di MEP actual a lubida di menciona cu ta bou gobernacion di MEP y Nel Oduber, mandatarionan Hulandes a bula bin Aruba cu avion militar pa kita e cartera di husticia y di dimas for di Rudy Croes, den feliz memoria y como regalo e delegacion di Hulanda a haya un buki di carnaval pa hiba bek cu nan.

Notabel tabata e hecho cu  Evelyn Wever Croes no a menciona ni un solo proyecto grandi di partido MEP den ultimo 51 aña, lubidando di bisa tambe cu ta cu MEP den gobierno refineria di San Nicolas a cera su portanan na varios ocasion y hasta e actual lider di MEP a dicidi di core cu CITGO permitiendo e compania aki liber di paga  300 miyon dollar pa falta di cumpli cu e contracto cu a wordo firma.

Un suma cu awe sin duda lo a yuda e pais grandemente, lo por a cubri e gasto di aumento di gasolin entre otro  pero realmente no por mira un solo caminda, cu Evelyn a menciona un solo logra na interes di pueblo cu su partido MEP a logra, cu no ta e Status Aparte cu e ta papia di dje,” Melvin Tromp di AVP a señala.