Ayera a traves di un comunicado di prensa di gobierno, a bira publico e noticia cu Melitza Geerman ayera 19 di september a entrega su retiro como director di e compania Serlimar.

Den un carta publica riba Viral297, Geerman ta sigura cu despues cu el a asumi e funcion aki na november di 2022, “cu hopi orguyo y satisfaccion mi ta wak back den e logronan significante, manera entre otro: Sali for di Surseance door di un areglo di pago cu Servicio di Impuesto y companianan cu Serlimar tabata debe, esnan cu a haci nan maximo esfuerso pa logra cursonan pa por ta miho den nan trabou, varios reunion cu a tuma luga den grupo chikito y grandi, cu a habri porta pa dialogo riba diferente topico di importancia pa personal, pago di periodiek y bevordering, na dump a y ta haciendo ainda trabounan pa sanea e tereno. Mi ta hiba cu mi e bon recuerdonan di cada un di boso, specialmente di tur cu tabatin un impacto positivo durante mi tempo na Serlimar y alabes mi ta gradici boso pa esaki. Semper keda duna y mustra e miho boso mes,” e carta tabata indica.

Na comienso di aña, minister Arends a señala cu Serlimar a cumpli cu su trahadonan cu pa añanan tabata den espera pa Serlimar y Gobierno di Aruba cumpli cu nan retraso den pago di bevordering, periodiek y overtime.

Por a recorda cu dia 22 di october 2022, mediante un comunicado di prensa minister Arends a anuncia cu Raad van Toezicht di Serlimar SG a nombra Sra. Melitza Geerman como e director di Serlimar entrante 1 di november 2022.

Den e tempo ey, Serlimar tabata den su momentonan crucial, cu retonan hopi grandi y alabes posibilidadnan real pa cambia e rumbo unda e patrimonio di Aruba tabata bayendo.

Despues di a pasa un proceso di solicitud e escogencia di e Raad van Toezicht a keda den Sra. Geerman. Sra. Geerman tin un Bachelor’s Degree den Business Administration, un Minor degree den Human Resources Management & Organization Development, y Economics. Alabes e tin trayectoria amplio den sector priva, unda e la fungi den diferente funcion clave tanto den management y marketing. Tambe el a traha como Head of Commercial/ Territory Manager Aruba na Superior Tobacco Aruba N.V. afilia na Philip Morris International.

Ayera, despues cu e carta di Geerman a bira conoci, minister Arends a reacciona riba su rednan social indicando cu “Mi a wordo informa door di Raad van Toezicht di Serlimar ayera den oranan di atardi cu e directora di Serlimar a tuma su retiro. Mi ta lamenta cu e compania ta haya su mes den un situacion asina na e momentonan anki. Mi a urgi RvT pa mantene e continuidad di e servicionan di Serlimar. Mi tin tur confiansa cu RvT lo cuminsa e proceso dentro di poco pa apunta un director nobo. Mi ta gradici Sra. Melitza Geerman pa su cooperacion y trabounan desplega y ta desea Sra. Melitza tur clase di exito.”