Dia 14 di juni 2019 Ministerio di Desaroyo Teritorial, Infrastructura y Medio Ambiente a ricibi propuesta pa remedia dump na Parkietenbos, esaki kier men pa remedia e dump cu nos tin actualmente por medio di implementacion di un sistema cu ta encera e tecnologia pa pone un capa riba esaki.
Melanie Lopez, kende ta Consehero di e ministerio, a duna di conoce cu e compania tabatin e oportunidad tambe pa entrega un proposicion pa destina e dump pa otro uzo, despues cu remedi’e. Dia 14 di juni a ricibi un proposicion di e grupo, pues a ricibi ambos proposicion esta, pa ‘remediate and repurpose’ como tambe e opcion pa remedia solamente. Pues dia 14 a habri e prome envelop cu ta pa cualifica e companianan prome y dia 27 di juni a habri e proposicion tecnico y plan di financiamento pa asina mira un tiki mas den detaye kico nan proposicion ta pa e remedia y ‘repurpose’ e sitio.
Aworaki e ekipo encarga cu evaluacion ta den e fase unda cu ta conduciendo e evaluacion di e propuestanan entrega pa e proyecto aki
Pa e proyecto di ‘sanitary landfill and hazardous waste facility’, esaki lo ta un dump nobo caminda lo depone di sushinan cu no por recicla, reusa y cu tampoco por bay den e incinerator. Importante den esaki ta cu lo crea un facilidad unda cu ta maneha desperdicio conforme normanan internacional. Cua normanan internacional no ta menciona den e Lopez su comunicado. Lopez a splica cu pa e destaho publico pa e proyecto aki a ricibi dia 1 di juli propuestanan di un grupo. Dialuna mes a habri e prome envelop cu ta e cualificacionnan, pa e team bay evalua esaki y pa otro siman lo habri e di dos envelop cu ta e proposicion tecnico y e prijs cu nan ta propone.
Pa conclui, Lopez a bisa splica di por logra yega na companianan pa por sigui den e fase di negociacion di e proyectonan, pa asina por logra e meta di mehora e forma con ta maneha desperdicio aki na Aruba.
