Mehoracion zonido carnaval pero falta hopi mas

95 dbA ta e maximo decibel  poni den e permiso pa SMAC por organisa e Carnaval. Por mira durante Parada di Blaas diadomingo cu bandanan ta tene cuenta cu e nivel di zonido stipula aki. Pero durante e Parada di Flambeu (Fakkel), e situacion tabata full otro: mayoria a surpasa e nivel maximo. 

Bon Dia tambe a remarca cu e participantenan hoben di parada di Blaas, mayoria tambe ta bisti nan earplugs, aunke e bandanan no mag di toca mas duro cu e 95 dbA. Sinembargo, e nivel aki ainda ta causa daño. A base di investigacion cientifico te cu awor, expertonan ta recomenda pa un zonido di 90 dbA no keda scucha mas cu 48 minuut total; 100 dbA no mas cu 5 minuut y 110 dbA 30 seconde so.

Esaki ta nifica cu e 95 dbA maximo stipula den e permiso ainda ta mucho duro pa bo keda baila un par di ora den e paradanan di Carnaval. 

Banda di esaki ainda no tin un maneho fiho, locual gobierno ta primintiendo pa hopi aña, pa regla e zonido (no solamente durante Carnaval, pero tur caminda) y controla esaki structuralmente. 

Manera menciona ayera durante e Parada di Blaas, mayoria di e muchanan tabata bisti earplugs. Esaki ta un desaroyo positivo despues di añanan di conscientisacion di parti di diferente fundacionnan (no gobierno). 

Adulto no ta proteha

Si por mira ayera na San Nicolas hopi mayor sin earplugs. Ora di papia cu varios, nan a comenta cu e horeanan di nan muchanan ta mas vulnerabel pues proteha nan ta necesario. Sinembargo pa nan mes nan no ta mira e necesidad. Un mayor tambe ta bisa: “Di nos ta daña caba, bisti nan awor no ta bay yuda mas.” 

Mayoria di e musiconan tampoco ta proteha nan horea. Y otronan cu tambe tin cu traha durante e parada, manera polis y periodista, poco di nan ta bisti earplugs. Por a mira e mesun situacion durante e Parada di Flambeu 2 di januari. Di e casi 7000 participante adulto masha poco tabata proteha nan horeanan. Mientrastanto e bandanan tabata toca hopi mas duro compara cu Parada di Blaas ayera. 

Malo pa curason 

E ultimo añanan medico tambe ta adverti contra zonido duro pasobra esaki tin efecto riba otro parti di nan curpa. Ora e zonido ta surpasa 50 dbA, hormona di stress ta sali den bo curpa causando bo curason bati mas duro y bo presion lo subi. Riba termino largo bo tin mas chens di mal funcion di bo curason, presion halto of di haya un atake celebral. Ora e nivel ta subi riba 90 decibel bo curpa ta haya mas adrenalina. P’esey hopi hende ta gusta zonido duro pasobra e ta duna bo un kick. Pero finalmente esaki no ta bon pa bo salud. 

Base

Cierto specialista di oido tambe ta recomenda cu mester tene cuenta cu zonido cu tin un frecuencia mas abou manera e tononan di base. Nan ta causa mas daño cu otro frecuencianan aunke normalmente no ta midi esaki. Cierto specialista ta recomenda e ora pa cuminsa midi e frecuencianan abou tambe. 

Durante e Parada di Blaas un señora na banda tambe ta bisa cu e ta sinti e efecto di e base. “Antes e zonido no tabata asina duro. Mi ta tapa mi horea pero toch mi ta sinti e zonido y e ta afecta mi curpa paden. Mi ta bin toch pasobra mi ta gusta carnaval. Ta e bandanan cu mester cuminsa tene cuenta, dicon nan mester pone asina hopi speaker, mi no ta compronde.”