Drecha proceso di permiso ta bin dilanti…
Tabata un sorpresa agradabel di mira un partido politico cuminsa campaña cu mehoracion di tramitenan den gobernacion. Esaki den un comentario di un dama abogado riba lista di e partido nobo POR. Como abogado sin duda e ta topa den su trabao hopi biaha cu cosnan cu ta pega dunando servicio na cliente empresario di exterior como tambe local. Y mester bisa cu e ehempelnan cu e ta menciona ta real y hasta un poco cuidadoso. Naturalmente tambe lo lanta di biaha cierto skepticismo cerca varios di nos cu ta pensa ‘hay que ver para creer’, sigur pasobra ta trata di un partido di cual e lider a caba di baha como ministro y no a uza su posicion nunca pa critica e situacion aki.
E tempo cu gobierno ta tuma pa tramita un peticion no ta solamente demasiado largo, pero tin cierto otro aspecto problematico cu tabata parti tambe di e comentario na cual nos ta referi. Esey ta e problematica di e proceso di obhecion y apelacion den caso di un decision negativo bao di e ley conoci como LAR (Landsverordening Administratieve Rechtspraak). Masha bunita, bao di presion Hulandes, nos a introduci e ley cu ta duna ciudadano derecho di apela un decision di cualkier organismo gubernamental. E filosofia di e ley tabata pa forsa e entidad gubernamental tuma un ‘second look’ riba e decision tuma, scuchando e argumentonan di e ciudadano. Si e decision di e comision LAR ta cu e decision gubernamental no tabata corecto, ta importante pa nan evita cu casonan similar tambe ta keda bin LAR pa obhecion. Loke mester haci ta concede e permiso na tur caso igual, aumentando asina eficiencia di e organismo. Esey ta sucede? Nos ta sigur cu tin caso unda esey ta sucede, pero no ta kere cu esey ta un practica general.
Pero tambe tin e casonan unda despues di tratamento den e comision un di e partidonan, mas tanto e ciudadano, ta dicidi di bay corte pa apela. Aki por cuminsa un ‘van het kastje naar de muur’ impresionante cu por costa e persona (o empresa) varios aña y hopi placa. Un dado momento hasta hues por duda si e mester trata un cierto apelacion, of ta e comision di obhecion mester trata e caso prome. Consecuencia: e tramitenan aki ta algo pa persona (empresa) cu hopi recurso financiero y hopi pasenshi. Di mes e ciudadano humilde no tin ningun beneficio cu e ley aki. Pa colmo pa esunnan cu tin recurso tambe e ta un estorbo, pasobra nan por paga un abogado pa bay corte di biaha; nan no mester di e ‘twee trapsraket’ confusivo aki. Solamente mas caro e ta sali, pasobra nan mester paga abogado pa dos proceso na luga di un so.
Pero e opinion tocante e utilidad en general di e proceso LAR no ta kita merito di e opcion, cu ta existi na Hulanda tambe, pa bolter e decision: na luga di despues di seis siman haya e derecho di entrega un obhecion pa un decision negativo ficticio, e mester bira un derecho pa procede dilanti corte di biaha pa forsa gobierno concede loke e persona a pidi. Esaki ta un poco diferente cu loke e politico referi a argumenta. E ta boga pa haya e derecho pa bay hues pa e entidad tuma un decision. Den hopi caso, tin biaha djis pa actitud vengativo, ta nenga e peticion y e ora e persona mester bolbe bay hues pa apela e decision. Hues mester bay evalua e caso atrobe, mientras cu den e prome proceso caba gobernacion a haya su oportunidad pa trece su caso dilanti. Banda di un splicacion debido pakico nan ta laat cu nan decision, nan por trece nan argumentonan dilanti si acaso ta mira motibo pa nenga toch. Anto no ta mira pakico e porta mester keda habri pa gobierno bay tuma un decision, cu riba su turno ta bira apelable.
Nos no mester lubida cu nos mester contempla e procesonan aki tambe for di angulo di efectividad y eficiencia pa cu e recursonan di apelacion legal cu nos tin. Cualkier proceso legal cu ta termina den corte y ta tuma demasiado tempo, ta perhudicando otro tipo di caso cu tambe merece atencion di corte.
En todo caso nos por bisa, cu tono positivo, cu e abogado/politico a trece un asunto dilanti, cu den cuadro di mehoracion di derecho di ciudadano ta un bon aportacion. Pero nos no mester mira mehoracion di e tramitenan gubernamental for di perspectiva so di derecho riba trato husto y na tempo. E por ta tambe un manera pa aporta na eficiencia en general, sigur si pasa tambe pa tramita practicamente tur cos via proceso digital. Ta un perdida enorme di tempo pa exigi un ciudadano cada biaha pa aparece en persona, cu tal y tal papel den man, hera a lubida di bis’e ‘esey tambe, bay bolbe otro dia’, kitando tempo valioso di e persona y di e entidad mes. Naturalmente tur esaki ta promesa o proposicion di un politico, y nos ta spera cu ta ‘practice what you preach’.
