Mas cu un luna despues cu a tir’e na su pia despues di un fiesta na Hollywood Hills, Megan Thee Stallion a bisa pa prome biaha cu strea di hip-hop, Tory Lanez ta e persona cu a tir’e.
“Si… Tory a tira mi. Bo a tira riba mi y bo a pone bo publicista y bo hende bay riba e blognan aki gañando”, e rapper di 25 aña di edad, kende su nomber legal ta Megan Pete, a bisa den un video riba Instagram Live. “Stop di gaña. Pakico gaña? Mi no ta compronde.”
Representantenan di Lanez, un rapper y cantante di 28 aña di edad kende su nomber legal ta Daystar Peterson, no a responde na peticion pa comentario.
Pete a bisa cu e no bisa polis di Los Angeles cu a yega na e escena dia 12 di juli tocante e tiramento pasobra e tabatin miedo di repercusion legal, y miedo pa su siguridad. “Mi no a bisa polis nada pasobra mi no tabata kier pa nos haya mas problema”, el a bisa den e video.
Peterson a keda aresta e mainta despues di e incidente pa sospecho di posesion di un arma scondi y a keda libera bou fiansa e mesun dia, pero no a acus’e formalmente di nada relaciona cu e incidente. Polis y fiscal ta bisa cu e caso ta sigui bou investigacion.
